भक्तपुर, १३ जेठभक्तपुर सांगीतिक समाजले भक्तपुर – चाँगुनारायण सडक खण्डलाई बरिष्ठ लोक गायक बुद्धिकृष्ण लामिछाने मार्ग नामाकरण गर्न माग गरेको छ । सामाजले शनिवार सूर्यविनायकमा आयोजना गरेको बिशेष कार्यक्रममा उक्त माग गरिएको हो ।
चाँगुनारायण नगरपालिकाका मेयर सोम मिश्रको उपस्थितिमा समाजका अध्यक्ष प्रविन शाहीले उक्त प्रस्ताव गरेको समाजका सचिव अल्बर्ट बज्राचार्यले बताए ।
‘बाखरी बाध्ने डोरीले मैले के गर्नु….घाँस काट्ने खुर्केर, आयो जोबन हुर्केर …, पीढीमा बसेर ….जस्ता दर्जनौ कर्णप्रिय गीतहरुका गायक बुद्धिकृष्ण लामिछाने भक्तपुरको चागुनारायण नगरपालिका निवासी हुन् । गाउदा गाउदै नाच्नुपर्ने स्वभावका लामिछानेलाई नियतीले प्यारालासिस बनाइदिएपछि अहिले व्हील चेयरको शरणमा पुग्न बाध्य बनेका छन् ।
शनिवार भक्तपुर सांगीतिक समाजले आफ्नो प्रथम साधारण सभाको अवसर पारेर लामिछानेलाई सम्मान गरेको छ । उक्त अवसरमा लामिछानेसहित वरिष्ठ संगीतकर्मी रोशन कुमार राजभण्डारीलाई भक्तपुर सांगीतिक समाजको तर्फबाट बरिष्ठ संगीतज्ञ तथा गोल्डेन भोइस अफ नेपाल प्रेमध्वज प्रधानले दस-दस हजार नगदसहितको सुशील चालिसे साहित्य संगीत सम्मान -२०७५ प्रदान गरेका थिए ।
प्रमुख अतिथिका रुपमा निम्त्याइएका बरिष्ठ संगीतज्ञ तथा गोल्डेन भोइस अफ नेपाल प्रेमध्वज प्रधानले लामिछाने र राजभन्डारीलाई सम्मान गर्न पाउदा खुशी लागेको बताए । अग्रजहरुप्रती नयाँ पुस्ताले गर्ने सम्मानले एउटा ममताको माला बन्ने कुरा व्यक्त गर्दै उनले यसको निरन्तरताको लागि शुभकामना दिएका थिए ।
‘गायकले आफ्नो एउटा गीत गाउँदा अरुको तीनवटा गीत सुन्नुपर्छ’, वरिष्ठ गायक प्रधानले भने, ‘गायकले आफ्नो गलालाई निखार्न दैनिक रियाज गर्न भुल्नुहुन्न।’
सम्मानित व्यक्तित्वले सम्मान पाउदा अपार खुशी भएको भन्दै आयोजक र प्रमुख अतिथि प्रधानलाई धन्यवाद दिएका थिए ।
सोही अवसरमा लोक गायक लामिछानेलाई माया गर्ने नेपाल मोबाइल बिक्रेता संघका अध्यक्ष दिनेश चुल्याद, विद्युतीय सामग्री व्यवसायी रोशन भोयद्यो र रुकेश रञ्जितले पाँच-पाँच हजार नगद पुरस्कार दिए ।
कार्यक्रममा लोक गायक लामिछानेको सम्मानमा गायक रोशन धौभडेलले लामिछानेका तीनवटा गीत प्रस्तुत गरेका थिए । त्यस्तै राजभण्डारीको सम्मान स्वरुप उनले संगीत भरेको एउटा गीत दृष्टि सुवेदीले आफ्नो आवाजमा गाएर सुनाएकी थिइन् । प्रमुख अतिथि प्रधानको सम्मानमा कपिल कस्पालले प्रधानको एउटा गीत गाएका थिए।
उक्त अवसरमा चाँगुनारायण नगरापालिकाका मेयर सोम मिश्र, भक्तपुर उद्योग बाणिज्य संघका अध्यक्ष राम प्रसाद प्रजापति, प्रहरी उपरीक्षक हिमालयकुमार श्रेष्ठ , लेखक / प्राध्यापक शिवप्रसाद मुनंकर्मी , साहित्यकार सुवासचन्द्र ढुंगेल , नेपाल तयारी पोशाक उत्पादन ब्यवसायी संघका अध्यक्ष रामकृष्ण श्रेष्ठ , भक्तपुर बिधुतिय सामाग्री ब्यबसायी संघका अध्यक्ष पुण्यराम खाताखो, भक्तपुर सहित्यिक समाजका अध्यक्ष राजुराम मुनन्कर्मी, मोर्डन कलेजका प्राचार्य अनिल कस्पाल लगायतको उपस्थिति रहेको थियो ।
कार्यक्रमको थप आकर्षणमा स्थानीय शिक्षासेवी लेखक / प्राध्यापक शिवप्रसाद मुनंकर्मीले भक्तपुरका गायक गायिकालाई सम्मान गर्न अक्षयकोष स्थापनाको लागि भक्तपुर सांगीतिक समाजलाई रु.५० हजार रुपैयाँ सहयोग गर्ने घोषणा गरे ।
सम्मान कार्यक्रम सकिएसंगै भक्तपुर सांगीतिक समाजले आफ्नो प्रथम साधारण सभा सम्पन्न गरेको थियो । सभाले तदर्थ समितिलाई अर्को कार्यकालको लागि निर्बिरोध निर्वाचित गरेको बताइएको छ ।
समाजका उपाध्यक्ष कपिल कस्पालले जनाए अनुसार भक्तपुर जिल्लामा जन्मथलो वा कर्मथलो भै संगीत कर्ममा लाग्ने संगीत साधकहरूको साझा सस्थाको रुपमा रहेको भक्तपुर सांगीतिक समाजमा देहायबमोजिमको कार्यसमिति बनेको छ ।
कस्पालका अनुसार अध्यक्ष : प्रविन शाही, उपाध्यक्ष : कपिल कस्पाल, सचिव : अल्बर्ट बज्राचार्य, कोषाध्यक्ष : रोशन धौभडेल रहेका छन् भने सदस्यहरुमा सुमन रंजीतकार, विवेक शाक्य, शम्भो चरण राजभन्डारी, श्रीजल मधिकर्मी, इन्दिरा लासिमस्यु, महेश्वर बोहोरा, मंगललक्ष्मी सिन्ताकला, विजय कायस्थ र श्रीहरि दाहाल निर्बिरोध निर्वाचित भएका छन् ।