काठमाडौँ, २७ साउन
मुगाको अवैध कारोबारमा संलग्न व्यक्तिहरुलाई प्रहरीले पक्राउ गरेको छ । पक्राउ पर्नेहरुमा यमन नागरिक ४३ बर्षीय अल -अस्री मोहम्मे याह्या यही, काठमाडौं महानगरपालिका-६ बस्ने मुगुका ५१ बर्षीय ग्याल्पु तामाङ र जुम्ला सिजा गाउँपालिका-३ का ३० बर्षीय नबिन चौलागाई रहेका छन ।
शुक्रबार काठमाडौं महानगरपालिका-२६ ठमेलस्थित होटल काठमाडौं इकोबाट प्रहरीले उनीहरुलाई पक्राउ गरेको हो । पक्राउ परेकाहरुलाई आवश्यक कारबाहीको लागि राजस्व कार्यालय हरिहर भवन पठाइएको र यस सम्बन्धमा थप अनुसन्धान समेत भइरहेको महानगरीय प्रहरी परिसर काठमाडौले जनायो ।
अल -अस्रीको कोठामा मुगाको अवैध कारोबार भइरहेको भन्ने सूचनाको आधारमा महानगरीय प्रहरी परिसर काठमाडौंबाट अनुसन्धानमा खटिएको प्रहरीले उनको कोठाबाट मुगा र नगद समेत बरामद गरी कारोबार गर्न कोठा नजिक आएका चौलागाई र तामाङलाई समेत नियन्त्रणमा लिएको बताइएको छ ।
अल -अस्रीको सुटकेशबाट ८ किलो मुगा, ५ हजार २ सय ३ अमेरिकन डलर, यमनको मुद्रा १४ हजार, इजिप्टको मुद्रा ७ सय ५०, चाईनिज मुद्रा ४ सय ९३, थाईल्याण्डको मुद्रा २ सय ६०, ओमन मुद्रा २७ र कतार रियाल १ तथा ग्याल्पु तामाङको झोलाबाट मुगा ४६ थान र ३ थान छवाङ्ग समेत बरामद भएको प्रहरीले जानकारी गरायो ।