प्रधानमन्त्री केपी शर्मा ओलीले जनयुद्ध लडेकालाई सरकारले सम्मान गर्ने बताएका छन् । प्रचण्डले उनीहरुको बेवास्ता गरेको आरोप लगाउँदै प्रधानमन्त्री ओलीले अब आफूले संरक्षण गर्ने बताएका हुन् ।
शनिवार बुटवलमा आयोजित सत्तारुढ नेकपाको आमसभालाई सम्बोधन गर्दै उनले भने, ” प्रचण्डले आफ्नो स्वार्थका लागि युवाहरुको प्रयोग गरेर अलपत्र छोडिदिए । अब सरकारले उनीहरुको हेरविचार गर्छ । हामी घाइतेको उपचार गर्छौं । परिचय पत्र दिन्छौं । रोजगारी र नियुक्तिमा उनीहरु र उनका परिवारका सदस्य लाई अवसर प्रदान गर्छौं ।”
ओलीले निर्मला र भागरथीको बलात्कार र हत्यामा संलग्न व्यक्तिलाई पनि पक्राउ गरी कारवाही गर्ने प्रतिवद्धता प्रकट गरेका छन् । कुनै हालतमा पक्राउ गरिन्छ । पानी मुनी गएको भए पनि छाडिने छैन ।उनले भने । कुनै पनि अपराधीलाई अब अन्मुक्ति नहुने उनको जिकिर छ । केहि समयभित्रै हत्याराहरु पक्राउ पर्ने शृंखला शुरु हुने उनले बताए ।
प्रधानमन्त्री ओलीले चुनावमा आफ्नो दलले समानुपातिकमा ५० लाख मत ल्याउने दावी समेत गरे भने प्रत्यक्ष तर्फ बहुमत ल्याउने बताए । त्यतिमात्र होइन उनले आफ्नो जनमत घटाएर देखाउन विपक्षीलाई चेतावनी पनि दिए ।