भक्तपुर, २० फागुन सरकारले प्रतिवन्धित बिद्रोही दल विप्लव नेतृत्वको नेकपाको प्रतिबन्ध फुकुवा गर्ने निर्णय गरेको छ । बिहीबार बसेको मन्त्रिपरिषद् बैठकले उक्त निर्णय गरेको हो ।
बैठकले सरकारी वार्ता टोली र बिद्रोही दलबीच भएको तीनबुँदे सहमति समेत अनुमोदन गरेको सहभागी एक मन्त्रीले भक्तपुरपोस्टलाई बताएका छन् ।
तीन चरणको वार्तापछि सरकार र विद्रोही नेकपाबीच तीन बुँदे सहमति भएको हो । सहमतिपछि दुबै टोलीका संयोजकले हस्ताक्षर गरेको प्रेस नोट जारी गरिएको छ । सरकारकाे तर्फबाट गृहमन्त्री रामबहादुर थापा बादल र प्रधानमन्त्रीका सल्लाहकार राजन भट्टराई त्यसैगरी बिद्रोही दलका तर्फबाट प्रवक्ता खड्गबहादुर विश्वकर्मा र केन्द्रीय सदस्य उदय चलाउने दीपक सहभागी रहेका छन् ।
दुई पक्षबीच भएको सहमतिअनुसार बिद्रोही पक्षले शान्तिपूर्ण राजनीति सञ्चालन गर्ने र सरकारका तर्फबाट लगाइएको विप्लव नेतृत्वको नेकपामाथिको प्रतिबन्ध हटाउने, सम्पूर्ण बन्दीको रिहाइ र मुद्दा खारेजी गर्ने लगायत सहमती भएकाे छ ।
सहमतिको विस्तृत विवरण भोलि शुक्रबार दिनको २ बजे सार्वजनिक गर्ने तयारी गरिएको छ । उक्त विशेष समारोह लाई प्रधानमन्त्री केपी शर्मा ओली र नेकपाका महासचिव नेत्रविक्रम चन्द (विप्लव) ले सम्बोधन गर्ने बताइएको छ।