भक्तपुर, १८ बैशाख २०७९नेकपा(माओवादी केन्द्र) ले स्थानीय निर्वाचनमा गठबन्धनले गरेको सहमती विपरीत दिएका उम्मेदवारी फिर्ता लिन २४ घण्टे अल्टिमेटम दिएको छ । बागमती प्रदेश अध्यक्ष सरल सहयात्रीले आइतबार एक प्रेस वक्तव्य जारी गर्दै सहमती अनुरुप समर्थन गर्न भन्दै यस्तो अल्टिमेटम दिएका हुन् ।
सत्तारुढ गठबन्धनले स्थानीय तहमा पद बाँड्फाँड गरी मिलेर उम्मेदवारी दिने सहमति गरेको थियो । त्यस विपरीत उम्मेदवारी परेपछि नेताहरुले उम्मेदवारी फिर्ताको प्रयास गरेका थिए । कतिपय उम्मेदवारले उम्मेदवारी फिर्ता नलिएपछि प्रदेश अध्यक्ष सहयात्रीले बिज्ञप्तिमार्फत कार्वाहीको चेतावनी समेत दिएका छन् । सोमबार साझ ५ बजेसम्म उम्मेदवारी फिर्ता लिएको घोषणा गरी आधिकारिक उम्मेदवार लाई समर्थन नगरे कार्वाही हुने बिज्ञप्तिमा उल्लेख छ । पार्टीका आधिकारिक उम्मेदवार विरुद्ध स्वतन्त्रमा बागी उम्मेदवारी दिएका उम्मेदवारलाई पनि पार्टीको आधिकारिक उम्मेदवारलाई समर्थन गरेको घोषणा नगरे कार्वाही हुने बताइएको छ । भक्तपुरमा के हुन्छ ?
भक्तपुरमा रहेका ४ नगर मध्ये प्रदेश स्तरीय निर्णयको कार्यान्वयन मध्यपुर थिमि नगरपालिकामा मात्र भएको छ । पूर्व सहमती बमोजिम यहाँ नेकपा (माओवादी केन्द्र)ले उप प्रमुख पाएपछि उपप्रमुख उम्मेदवार विजय कृष्ण श्रेष्ठको नेतृत्वमा अन्य वडामा वडा सदस्यसहित चुनावी मैदानमा होमिएको देखिन्छ । सहमती भएका सूर्यविनायक र भक्तपुर नगरमा भने माओवादी केन्द्रले पुरै प्यानल प्रस्तुत गरेको छ । सूर्यविनायकमा मेयर कल्पदीप राइको नेतृत्वमा र भक्तपुरमा तुल्सीभक्त सुवालको नेतृत्वमा माओवादी केन्द्रले उम्मेदवारी दिएको देखिन्छ । माओवादी केन्द्रका केन्द्रीय सदस्य एवं भक्तपुरका नेता डिपी ढकालले भने यी दुई नगरपालिकामा प्रमुख, उपप्रमुख नलिए वापत वडाहरु मिलाउनुपर्नेमा नमिलाइएकोले सहमती भएको भन्न नमिल्ने दावी गरेका छन् ।
माओवादी केन्द्रका बागमती प्रदेश अध्यक्ष सरल सहयात्रीले पनि भक्तपुरका सूर्यविनायक र भक्तपुरमा मित्रवत प्रतिस्पर्धा हुने प्रष्ट पारे । प्रमुख उपप्रमुख छोड्दा पनि वडामा सहमती नभएको लाई सहमती भएको नमानिने उनले जानकारी गराए । आइतबार प्रकाशित वक्तव्यले भक्तपुरका उम्मेदवारलाई प्रभाव नपार्ने उनको भनाइ छ ।
प्रदेश स्तरीय सहमती गर्दा चाँगुनारायण नगरमा भने सहमती हुन सकेको थिएन । यहाँ माओवादी केन्द्रले नरेश खड्काको नेतृत्वमा आफ्ना उम्मेदवारहरु उठाएर चुनावी अभियान शुरु गरिसकेको छ ।