भक्तपुर, १६ साउन २०७९भक्तपुर जिल्ला अदालतका मुख्य न्यायाधीश गोपालप्रसाद बास्तोला उच्च अदालत पाटनको मूल्यांकनमा उत्कृष्ट सावित हुँदै सम्मानित भएका छन् । मातहत जिल्ला अदालतका न्यायाधीश मध्ये सर्वाधिक मुद्दा फैसला गरेको भन्दै उच्च अदालत पाटनले बास्तोलालाई सम्मान गरेको हो । शुक्रवार उच्च अदालत पाटनको सभाहलमा सम्पन्न वार्षिक समिक्षा कार्यक्रममा जिल्ला अदालत भक्तपुरका मुख्य न्यायाधीश बास्तोलालाई उच्च अदालत पाटनका मुख्य न्यायाधीशले सम्मान पत्र प्रदान गरेका हुन् । आर्थिक वर्ष २०७८/७९ मा मातहतका जिल्ला अदालत मध्ये भक्तपुर जिल्ला अदालतका मुख्य न्यायाधीश बास्तोलाले सबैभन्दा धेरै मुद्दा फैसला गरेकाले सम्मान पत्र प्रदान गरिएको बताइएको छ । भक्तपुर जिल्ला अदालतको १ नम्बर इजलासका न्यायाधीश बास्तोलाले बागमती प्रदेश अन्तर्गत मात्र नभई देशैभरका जिल्ला न्यायाधीशमध्ये सर्वाधिक मुद्दा फैसलाको रेकर्ड राखेका छन् । उनले सम्पन्न आर्थिक वर्षमा करिब ७ सय मुद्दा फैसला गर्दै एक वर्षमा सबैभन्दा धेरै मुद्दा फैसला गर्ने न्यायाधीशको रेकर्ड राखेका हुन् । समिक्षा कार्यक्रममा उच्च अदालत पाटन हेटौंडा इजलासका न्यायाधीश नरिश्वर भण्डारी पनि उच्च अदालत पाटनका न्यायाधीश मध्ये सबैभन्दा धेरै मुद्दा फैसला गरेकोप्रति सम्मानित भएका छन् ।