नेपाल विद्यालय कर्मचारी परिषद्ले विद्यालय कर्मचारीलाई स्थायी गर्नुपर्ने माग गरेकाे छ । विद्यालय कर्मचारीलाई दरबन्दी सिर्जना गरी स्थायी गर्नुपर्ने माग गरिएको हो ।

विद्यालयमा कामगर्ने कर्मचारीहरुको पेशागत हकहितको लागि काम गर्ने संगठनको रुपमा नेपाल विद्यालय कर्मचारी परिषद् रहेको छ । परिषद्को नवनिर्वाचित कार्यसमितिले विद्यालयमा कार्यरत कर्मचारीलाई दरबन्दी सिर्जना गर्नुपर्ने र निजामती कर्मचारीसरहको सेवा सुविधा पाउनुपर्ने माग गरेको हो ।

काठमाडाैंमा सम्पन्न पाँचौँ राष्ट्रिय महाधिवेशनबाट बहादुर खड्काको नेतृत्वमा नयाँ कार्यसमिति चयन भएको छ । विद्यालय तहमा काम गर्ने लेखापाल र कार्यालय सहयोगी रहेको उक्त परिषदमा अहिले करीब ४० हजार कर्मचारी आबद्ध रहेको बताइएको छ ।

परिषद्का नवनिर्वाचित अध्यक्ष बहादुर खड्काले शुक्रबार आयोजित पत्रकार सम्मेलनमा विद्यालय तहमा काम गर्ने सवै कर्मचारी राष्ट्रसेवक भएकोले निजामती कर्मचारीसरह ब्यवहार गरिनुपर्ने बताएका छन् । संघीय शिक्षा ऐनमा परिमार्जन गरी आवश्यक दरबन्दी सिर्जना गरेर स्थायी गर्नुपर्ने उनले प्रष्ट पारे ।

शिक्षा निययमावली २०२८ मा शिक्षकसरह तलब पाउने भनिए तापनि आफूहरुले  शिक्षकसरह तलब पाउन नसकेको अध्यक्ष खड्काले गुनासो गरे । त्यतिमात्र होइन, सरकारले दरबन्दीमा नराख्दा पोशाक र महँगी भत्तासमेत नपाएकाेमा उनीहरु दुखी देखिए ।

अधिकांस बिद्यालय कर्मचारी आर्थिक रुपमा बिपन्न रहेका छन् तर राज्यले उनीहरुलाई उपेक्षा गर्दै आएको छ । पोशाक सुबिधा र महंगी भत्ताका असल हकदार उनीहरु भएपनि राज्यको विभेद जारी छ ।  राजनीतिक परिबर्तनले पनि उनीहरुको श्रमको सम्मान गर्न नसक्दा गणतन्त्रमा पनि बिद्यालय कर्मचारीहरु विभेदका साथ् बाच्न बिवस बनाइएका छन् ।