काठमाडौं, २० साउनशनिवार रातीको अविरल बर्षाका कारण हनुमन्ते खोलामा बाढी आएको छ । आइतवार बिहानैबाट खोला आसपासका बस्तीमा बाढी पसेपछि जनजीवन कष्टकर बनेको छ ।
खोेलाको जग्गा अतिक्रमण भएर साँघुरो भएपछि पानीको बहाव बाहिर निस्किएर वस्तीमा पसेको पाइएको छ । जगाती , सूर्यविनायक,सल्लाघारी , सृजनानगर , राधेराथे , ठिमी लगायतका क्षेत्रमा बाढी पसेपछि मानिसहरु चिन्तित बनेका छन् ।
यस अघि असार २९ मा पनि पसेको बाढीको कहर भुल्न नपाउदै हनुमन्ते खोलाले फेरि स्थानीयको सातो लिएको छ । मानिसहरु घरमा पसेको पानी कसरी निकाल्ने भन्ने ध्याउन्नमा लागेका छन् ।
पानी पसेपछि केहि विद्यालयहरु समेत बन्द भएका छन । विद्यालयमै पानी पसेपछि सरसामान त् नष्ट हुने नै भयो बालबच्चाहरु डराएर बिजोग भएको शिक्षक राम दुवाल बताउँछन् ।
जनताको जीउ धनप्रति केन्द्र सरकार मात्र नभई स्थानीय सरकार समेत जिम्मेवार हुन नसकेको स्थानीय राजु झाको आरोप रहेको छ । पटक पटक बस्तीमा पानी पसेपनि सरकारी निकायहरु कानमा तेल हालेर बस्दा आफूहरुको चित्कार उनीहरुले सुन्न नसकेको भन्दै स्थानीयहरुले आक्रोस व्यक्त गरेका छन् । पानी पर्ना साथ् निदाउन नसक्ने अवस्थाको अन्त्य गर्दै हनुमन्ते खोलाको दीर्घकालिन समाधान खोज्नुपर्ने उनीहरुले माग गरेका छन् ।
