एक साताअघि चोरी भएको स्कारपियो जीप चोरीमा प्रहरीकै संलग्नता देखिएको छ । पश्चिम नवलपरासीको सुनवलबाट चोरिएको जीप सशस्त्र प्रहरी हवल्दारको निजी घरमा फेला परेपछि उनलाई पक्राउ गरिएको छ ।

बा १५ च २१०४ नं को उक्त जीप सशस्त्र प्रहरी बल पश्चिम नवलपरासी नं २६ गण बेलासपुरमा कार्यरत वरिष्ठ हवल्दार ठाकुरप्रसाद चौधरीको निवास बर्दघाट –५ मा फेला परेको हो ।

गाडी खोज्न ग्राहक बनेर खटिएको प्रहरी टोलीले गाडी सहित हवल्दार चौधरीलाई पक्राउ गरेको छ ।

गाडी किन्न भन्दै गएका इलाका प्रहरी कार्यालयका प्रहरी जवान गुमानसिंह कुमाललाई सैनामैनाका दिलीप बोहाराले चाैधरीको घरमा पुर्याएका थिए ।

गाडी चोरीको आरोपमा प्रहरीले हवल्दार चौधरीसहित रुपन्देही सैनामैना नगरपालिका–३ का दिलीप बोहोरा र बुटवल उपमहानगरपालिका–१३ बेलवासकी जानकी बराललाई पनि पक्राउ गरेको छ । चोरीमा संलग्न तीनै जनालाई चोरी मुद्दामा कारबाही अघि बढाइएकोे प्रहरीले बताएको छ ।