रसुवा, २८ भदाैकेहि दिनदेखि अवरुद्ध पासाङल्हामु लोकमार्ग आजबाट सुचारु भएको छ । अवरुद्ध धुञ्चे–स्याफ्रु खोपाङ भिरको मार्ग आजबाट संचालनमा आएको हो ।
पहिरोका कारण करीब १ सय मिटर राजमार्ग सतहमा बसेको ठूलाठूला ढुङ्गा पन्छाइएपछि आजदेखि नेपाल–चीनबीचको अन्तर्राष्ट्रिय हाइवे सञ्चालन गरिएको डिभिजन सडक कार्यालयका इञ्जिनियर सरोज कडरियाले जानकारी गराए ।
रसुवाका प्रमुख जिल्ला अधिकारी कृष्ण पौडेलको अथक प्रयासपछि पहिरो पन्छाउन सफल भएको डिभिजन सडक कार्यालयले जनाएको छ । कार्यालयका दुई वटा लोडर तथा डोजरले पहिरो पन्छाउन नसकेपछि प्रजिअ पौडेलले रसुवाबाट प्रतिनिधित्व गर्ने सांसद् र अन्य सहयोगीबाट सहयोग जुटाउन सफल भएका थिए ।
सांसद् मोहन आचार्य र पूर्वसांसद् जनार्दन ढकाल लगायतले सडक खुलाउन सहयोग गरेबापत प्रजिअ पौडेलले धन्यबाद समेत ब्यक्त गरेका छन् ।
गत साउन ९ गतेदेखि सडक सुचारु हुन नसक्दा अर्बौ बढी राजश्व नोक्सान भएको थियो । आज सडक सुचारु भएसंगै २ सय भन्दाबढी सवारी साधन आफ्नो गन्तव्यतर्फ लागेका छन् ।