प्रहरीले चोर कुटेको त् तपाईले देख्नु भएकै होला तर पर्सामा भने चोरले नै प्रहरी कुटेर फरार भएका छन । पेट्रोलियम पदार्थको तस्करी रोक्न गएका प्रहरीहरुलाई तस्करहरुले कुटपिट मात्र गरेनन बल्कि हतियारसमेत खोसेर फरार भएका छन ।

पाङ्डेपुरका प्रहरीलाई तस्करले कुटपिट गरी हतियार लिएर फरार भएको जिल्ला प्रहरी कार्यालय पर्साले जनाएको छ । तस्करहरुको खोजीकार्य जारी रहेको पर्साका प्रहरी उपरीक्षक रेवती ढकालले बताएका छन ।

सीमावर्ती भारतको इनर्वा बजारतर्फ पेट्रोलियम पदार्थको तस्करहरुलाई रोक्न गएको नेपाली प्रहरीहरु
\तस्करका निसानामा परेका हुन् । प्रहरी चौकी पिडारीगुठी र प्रहरीचौकी पाङ्डेपुरका प्रहरीहरु माथि तस्करले लाठी, भाटाले आक्रमण गरेको र एकथान थ्रीनट थ्री बन्दुक लुटेर फरार भएका बताइएको छ ।

तस्करको कुटाइबाट प्रहरी चौकी पाङ्डेपुरका असई विष्णुदेव यादव, प्रहरी जवान प्रेमबहादुर राणा र अर्जुन चौधरी घाइते भएका र उनीहरुको वीरगञ्जमा उपचार भइरहेको जानकारी प्राप्त भएको छ ।