भक्तपुर, २६ साउन मध्यपुर ठिमी-९ राधे राधेस्थित एक होटलमा प्रहरीले छापा हान्दा ५ जना पक्राउ परेका छन् । तास खेलिरहेको अवस्थामा प्रहरीले उनीहरुलाई पक्राउ गरेको हो ।
हरी बहादुर रानाभाटले संचालन गरेको शुभकामना होटेलबाट उनीहरुलाई आइतवार बेलुकी करीब साढे पाँच बजेको समयमा प्रहरीले पक्रेको हो । विशेष सूचनाको आधारमा पुगेको महानगरीय प्रहरी परिसर भक्तपुरको प्रहरी टोलीले तास खेलिरहेको अवस्थामा नगद तीस हजार छ सय चालिस रुपैया र ६ बुक तास सहित ५ जनालाई पक्राउ गरेको परिसरका डीएसपी रेवतीरमण पोखरेलले जानकारी गराएका हुन् ।
पोखरेलका अनुसार पक्राउ परेका सबैजनालाई महानगरीय प्रहरी परिसर भक्तपुरमा राखी आवस्यक अनुसन्धान कार्य भईरहेको छ ।
यसैबीच महानगरीय प्रहरी परिसर भक्तपुर र महानगरीय प्रहरी वृत्त जगातीबाट खटिएका २० जना प्रहरीको टोलीले गाँजाका बोटहरु नष्ट गरेको छ । सूर्यविनायक-७ गुन्डु नयाँबस्तीको सार्वजनिक स्थानमा प्राकृतिक रुपमा आफै उम्रेका अन्दाजी चार हजार दुई सय गाँजाका बोटहरु आइतवार बेलुकी नष्ट गरिएको डीएसपी पोखरेलले बताएका छन् ।
उक्त स्थानबाट ९५ लिटर घरेलु मदिरा समेत नियन्त्रणमा लिई स्थानीय भद्रभलादमीको रोहबरमा नष्ट गरिएको उनले जानकारी गराए ।