भक्तपुर, १ पुस भूमिसुधार तथा मालपोत कार्यालय भक्तपुरमा कार्यरत नायब सुब्वा नारायणराज मिश्र र कार्यालय सहयोगी भाईकाजी गौतम उपर भ्रष्टाचार अभियोगमा अख्तियारले आरोप पत्र दायर गरेको छ । मंगलवार विशेष अदालतमा उनीहरु उपर आरोप पत्र दायर गरिएको हो ।
सेवाग्राहीको मोही लगत कट्टा गर्ने प्रयोजनका लागि सोही कार्यालयमा कार्यरत कार्यालय सहयोगी (करार) भाईकाजी गौतम र नायब सुब्वा नारायणराज मिश्रले आपसी मिलेमतोमा रु. ४०हजार घुस लिएको अख्तियारको दावी छ । अख्तियार दुरुपयोग अनुसन्धान आयोग टङ्गालबाट खटिई गएको टोलीले सेवाग्राहीबाट रु. ४० हजार घुस लिइसकेको अवस्थामा दुवै जनालाई नियन्त्रणमा लिई अनुसन्धान गरेको थियो ।
अनुसन्धानको सिलसिलामा भूमिसुधार तथा मालपोत कार्यालय, भक्तपुरका नायव सुब्वा नारायणराज मिश्रले सेवाग्राहीको मोही लगतकट्टा गरिदिने प्रयोजनको लागि लेखापढी व्यवसायीमार्फत घुस/रिसवत पाए काम गरिदिने भनी नियमानुसार गर्नुपर्ने कामको लागि बहाना बनाई उक्त कार्यालयका कार्यालय सहयोगी भाईकाजी गौतमलाई लिन लगाई घुस वापतको रकम लिएपछि मोही लगतकट्टा गर्ने निर्णय कागजात दिएको समेतबाट उनीहरुको संलग्नता पुष्टी भएको अख्तियारका प्रवक्ता प्रदीपकुमार कोइरालाले बताए ।
नायव सुब्बा नारायणराज मिश्रले घुस/रिसवत माग गरी बुझ्न लगाएको प्रमाणित हुन आई निजको सो कार्य भ्रष्टाचार निवारण ऐन, २०५९ को दफा ३ को उपदफा (१) को कसुर भएको भन्दै नारायणराज मिश्रलाई बिगो रु. ४० हजार कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को खण्ड (ख) बमोजिम सजाय हुन मागदाबी गर्दै अख्तियारले आरोप पत्र दायर गरिएको बुझिएको छ ।
साथै भूमिसुधार तथा मालपोत कार्यालय भक्तपुरका कार्यालय सहयोगी भाईकाजी गौतमले घुस/रिसवत वापतको रकम बुझी मतियारको भूमिका खेलेको पुष्टि हुन आएको हुँदा भ्रष्टाचार निवारण ऐन, २०५९ को दफा ३ को उपदफा (१) बमोजिम ऐ.ऐनको दफा २२ ले मतियारको कसुर गरेको पुष्टि भएको अख्तियारको भनाइ छ । गौतमलाई बिगो रु. ४० हजार नै कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को खण्ड (ख) बमोजिम हुने सजायमा भ्रष्टाचार निवारण ऐन, २०५९ को दफा २२ को प्रतिबन्धात्मक वाक्याशं बमोजिम सजाय हुन मागदाबी लिई आरोपपत्र दायर गरिएको बताइएको छ ।