भक्तपुर, ७ पुसनेपाल प्रहरी स्कुल साँगाद्वारा आयोजित २७ औ प्रहरी महानिरीक्षक फुटबल प्रतियोगिताको फाईनलमा भक्तपुरको सैनिक आवासीय महाविद्यालय पराजित भएको छ । फाइनलमा आयोजक प्रहरी स्कुलले सैनिकलाई पराजित गरेको हो ।
सोमबार सम्पन्न फाईनल खेलमा सैनिक आवासिय महाविद्यालय भक्तपुरलाई शुन्यका विरुद्ध तीन गोल गर्दै नेपाल प्रहरी स्कुल ए टिमले जीत हासिल गर्न सफल भएको छ ।
खेलको १४ मिनेटमै समिर वनले पहिलो गोल गर्दै प्रहरीलाई अग्रता दिलाएका थिए भने श्रीहन गँडेलले ५४ मिनेटमा दोश्रो गोल गरे । त्यसैगरी तेश्रो गोल ७६ औ मिनेटमा विमोजित राजबंशीले गरेपछि सैनिकले खेल गुमाउन पुग्यो ।
विजयी टिमलाई प्रहरी महानिरीक्षक सर्वेन्द्र खनालले नगद ३० हजार सहित ट्रफी, मेडल, प्रमाण–पत्र वितरण गरेका थिए । उप विजेता सैनिक आवासिय महाविद्यालय भक्तपुरले नगद २० हजार प्राप्त गर्यो भने एसओएस बालग्राम बनेपाले १० हजार रुपैया सहित तृतीय पुरस्कार प्राप्त गरेको थियो ।
उक्त अवसरमा म्यान अफ दि म्याच, फेयर प्ले, हाई स्कोर, प्लेयर अफ द टुर्नामेन्टलाई पनि पुरस्कार वितरण गरिएको थियो ।