भक्तपुर, २१ पुस रिसोर्टलाई नै जुवा घर बनाई जुवा तास खेलिरहेको अवस्थामा १४ जना प्रहरीको फन्दामा परेका छन् । सोमबार करिब ३ बजेको समयमा उनीहरुलाई प्रहरीले पक्राउ गरेको हो ।
मध्यपुर ठिमी नगरपालिका वडा नं. ९ निलबाराही टिगनी स्थित सुर्य बहादुर श्रेष्ठले संचालन गरेको निल बाराही रिसोर्टमा पैसाको हारजित हुने गरी जुवा तास खेलिरहेको अवस्थामा १४ जनालाई नियन्त्रणमा लिइएको प्रहरीले पुष्टि गरेको छ । महानगरीय प्रहरी परिसर भक्तपुरका सूचना अधिकृत रहेका इन्स्पेक्टर पंचलाल गोलेले दिएको जानकारी अनुसार उनीहरु सुराकीको आधारमा समातिएका हुन् ।
”महानगरीय प्रहरी वृत्त ठिमीबाट खटिएको बिशेष टोलीले चेकजाँच गर्दा १४ जना मानिसहरु जुवा तास खेली रहेको अबस्थामा फेला पारी पक्राउ गरिएको छ ।” इन्स्पेक्टर गोलेले भने । उक्त खालबाट ४ बुक तास, नगद ७ लाख ३ हजार १सय ९० नेपाली रुपैया र भारतिय रुपैया रु.७हजार ६सय ६० समेत बरामद गरीएको गोलेले जानकारी गराए ।
पक्राउ परेका सबैजनालाई सोमबार नै जिल्ला प्रशासन कार्यालय भक्तपुरमा पेश गरी सार्वजनिक हित, स्वास्थ्य, सुरक्षा, सुबिधा र नैतिकता बिरुद्धको कसुर अन्तर्गत जुवा खेलेको र खेलाएको मुद्दामा म्याद थप भई अनुसन्धान कार्य भईरहेको प्रहरीको भनाइ छ । प्रहरीले पक्राउ परेका जुवाडे भनिएका व्यक्तिहरुको पहिचान भने सार्वजनिक गरेको छैन ।
