भक्तपुर, २१ पुस शिक्षा, विज्ञान तथा प्रविधिमन्त्री गिरिराजमणि पोखरेल नेतृत्वको टोलीले भक्तपुरको सानोठिमीस्थित जनक शिक्षा सामग्री केन्द्र लिमिटेडको अनुगमन गरेको छ । मंगलवार उक्त टोलीले पाठ्यपुस्तक छपाइको अवस्थाबारे अनुगमन गरेको हो ।
मन्त्री नेतृत्वको टोलीमा शिक्षा सचिव महेश दाहाल, शिक्षा तथा मानव स्रोत विकास केन्द्रका महानिर्देशक बाबुराम भट्टराई लगायत सहभागी रहेका थिए । मन्त्रीको टोली आगामी शैक्षिक सत्र २०७७ का लागि आवश्यक रङ्गीन पाठ्यपुस्तक छपाइको अनुगमन गर्न सानोठिमी आएको मन्त्री पोखरेलका प्रेस संयोजक सुनिल खड्काले भक्तपुर पोस्टलाई बताए ।
अनुगमनपछि सञ्चारकर्मीसँग कुरा गर्दै मन्त्री पोखरेलले जनक शिक्षाले आगामी शैक्षिक सत्रमा समयमै पाठ्यपुस्तक पुर्याउने गरी छपाइ कार्य गरिरहेकोको प्रति सन्तोष व्यक्त गरे ।आफूले यस अघिको कार्यकालमा रङ्गीन पाठ्यपुस्तक छपाउने निर्णय लिएको स्मरण गर्दै मन्त्री पोखरेलले अहिले कक्षा ८ सम्म रङ्गीन पुस्तक छापिदै गरेको देख्दा खुशी लागेको बताए ।
उक्त अवसरमा मन्त्री पोखरेलले प्रदेशस्तरमा समेत पुस्तक छपाइ र वितरणको काम शुरु गर्ने आफ्नो योजना रहेको समेत खुलासा गरे । शिक्षाको पहिलो आधार पाठ्यपुस्तक भएको भन्दै उनले यसमा कुनै लापरवाही गर्न नहुनेमा जोड दिएका थिए ।
अनुगमनका क्रममा मन्त्रालयका सचिव महेश दाहालले केन्द्रले अब पाठ्यपुस्तक छाप्ने मात्रै नभई सबै बाहिरबाट काम ल्याएर संस्थाको आम्दानी बढाउने कार्य तर्फ समेत ध्यान पुर्याउनेपर्ने बताएका थिए भने केन्द्रका प्रबन्ध सञ्चालक महेश तिमिल्सिनाले आफ्नो कार्यकालमा पाठ्यपुस्तक अभाव हुन् नदिएको दावी गर्दै आगामी योजनाहरु सुनाएका थिए ।