६ माघ २०७६भक्तपुर । प्राविधिक शिक्षा सञ्चालनका लागि अक्षयकोष खडा गर्ने उद्देश्यले दुवाकोटस्थित चाँगुनारायण माध्यामिक विद्यालयले सप्ताहव्यापी श्रीमदभागवत ज्ञान महायज्ञ गर्ने भएको छ ।
सोमबार पत्रकार सम्मेलन गरेर विद्यालयले महायज्ञ सञ्चालन गर्ने जनाएको हो । पण्डित माधवप्रसाद कुइँकेलले श्रीमदभागवत वाचन गर्ने जनाइएको छ ।
पत्रकार सम्मेलनमा विद्यालयमा प्रधानाध्यापक दधिराम गेलालले करिब एक करोड रुपैयाँ संकलन गरेर प्राविधिक शिक्षा दिने उद्देश्य पूरा गर्न महायज्ञ गर्न लागिएको जानकारी दिए ।
महायज्ञपश्चात् विद्यालयमा सिभिल, कम्प्युटर र कृषिसम्बन्धी डिप्लोमा इञ्जिनियरिङ कक्षा सञ्चालन गर्ने उद्देश्य सुनाउँदै प्रअ गेलालले विद्यालयसँग भएको २५ रोपनी जग्गामा प्रयोगात्मक कक्षा गराएर कृषि प्राविधिक पनि उत्पादन गर्न सकिने स्पष्ट पारे ।
नेपालका पहिलो राष्ट्रपति रामवरण यादवले उक्त महायज्ञको उद्घाटन गर्ने विद्यालय व्यवस्थापन समितिका अध्यक्ष उद्धव खड्काले जानकारी दिए । चाँगुनारायण नगरपालिका–१ का वडा सदस्यसमेत रहेका खड्काले महायज्ञ सञ्चालनमा सहयोग गर्न सबैसँग आग्रह गरे ।
कक्षा १२ सम्म पढाइ हुने विद्यालयमा हाल पाँच सय पाँच जना विद्यार्थीहरु अध्ययनरत छन् ।