काठमाडौं । प्रतिनिधिसभाकी कांग्रेस सांसद पार्वता डिसी चौधरीले ठगी गरेको भन्दै संसद सचिवालयमै उजुरी परेको छ ।

दाङको तत्कालीन गढवा गाविसका कांग्रेस उपसभापति समेत रहेका कृष्णराज पाण्डे र लिलाबहादुर थापाले सांसद चौधरीले आठ लाख रुपैंयाँ ठगी गरेको आरोप लगाउँदै संसद सचिवालयमा उजुरी दिएका हुन् । संसद सचिवालयले उजुरी दर्ता भएको, तर यसबारे के गर्ने भन्ने जानकारी नभएको जनाएको छ ।

सांसद चौधरीले २०७४ सालमा शुरुमा तीन लाख र पछि पाँच लाख गरी आठ लाख रुपैयाँ लिएकोमा पटक–पटक फिर्ता माग्दा समेत नदिएपछि उजुरीमा उल्लेख छ । पार्टीमा पटक–पटक उजुरी गर्दा पनि सुनुवाई नभएपछि संसद सचिवालय गुहार्नुपरेको कृष्णराज पाण्डेले बताएका छन् ।

चौधरीलाई उनको एभरेष्ट बैंकको खातामा दुई पटक रकम पठाएको भौचर समेत सचिवालयमा पेश गरिएको उनीहरुले दावी गरेका छन् । विश्वासको सम्बन्धका कारण पार्टीको नेतालाई दिएको पैसा फिर्ता नगरेपछि कानुनी कारबाहीको लागि जानुपरेको पाण्डे बताउँछन् ।

संसद सचिवालयका महासचिवलाई सम्बोधन गरेर सोमबार दर्ता गरिएको उजुरीमा सांसद चौधरी आफूहरुको सम्पर्कमा आउन नचाहेकाले उनलाई झिकाएर रकम दिलाई दिन आग्रह गरिएको छ । उजुरीबारे प्रतिक्रिया लिन सांसद चौधरीलाई सम्पर्क गर्दा एउटा मोबाइल स्वीच्ड अफ छ भने अर्को नम्बरमा फोन उठेन ।

यस्तैै सांसद चौधरीले योजना पारिदिने भन्दै त्यसवाफत अग्रिम कमिसन माग्ने गरेको दाङका जनप्रतिनिधिहरु बताउँछन् । कांग्रेस सांसद चौधरी दोस्रो संविधानसभा निर्वाचनमा दाङ क्षेत्र नम्बर–१ बाट प्रत्यक्ष निर्वाचित भएकी थिइन् । हाल प्रतिनिधिसभामा उनी समानुपातिकबाट सांसद छिन् । दाङ देउखुरीको लमही नगरपालिका–५ लमही घर भएकी उनी नेपाली कांग्रेसको केन्द्रीय सदस्य हुन् ।