सिद्धान्त अनुसार कम्युनिष्टहरु कम्युनका हिमायती हुनुपर्नेमा नेपालको कम्युनिष्ट पार्टीका नेताकार्यकर्ताहरुले यसलाई व्यवहारमा बिर्सिएको देखिन्छ । तर, नेपालमा एउटा कम्युनिष्ट कम्युन भने अहिले पनि अस्तित्वमा रहेको छ । शनिवार यसले आफ्नो १७ औं वर्षगाँठ मनाउन समेत सफल भएको छ ।

महोत्तरीको बर्दीबासमा रहेको नेपालकै एकमात्र कम्युनिष्ट कम्युन ‘आधारशिला’ ले १७ औं वर्षगाँठ मनाउन सफल भएको हो । १७ औं वर्षगाँठको अवसरमा महोत्तरीको बर्दीबासमा उत्सवको आयोजना गरिएको थियो । पूर्व प्रधानमन्त्री एवं नेकपाका वरिस्ठ नेता झलनाथ खनाल, रास्ट्रिय सभा सदस्य एवं नेकपाका प्रवक्ता नारायणकाजी श्रेष्ठ प्रकाश, कलाकारहरु रामेश, रायन, जेबी टुहुरे लगायत कम्युनिष्ट बिचार बाट प्रेरित युवा तथा विद्यार्थीहरु  बार्षिकोत्सवको अवसरमा आधारशीला पुगेका थिए ।

‘आधारशीला’ शिक्षा, विज्ञान तथा प्रविधि मन्त्री एवं नेकपाका नेता गिरिराजमणि पोखरेलको नेतृत्वमा स्थापित कम्युन हो । यसको संरक्षकको रुपमा भने नेता नारायणकाजी श्रेष्ठ प्रकाश रहेका छन् । आधारशिलामा १७ परिवार सामुहिक जीवानशैलीमा रमाइरहेका छन् ।ब्यक्तिबादी चिन्तन हावी भैरहेको वर्तमान परिवेशमा पनि आधारशीलाले आफ्नो सामुहिकतालाई जीवन्त राख्दै १७ औ वर्ष प्रवेश गर्नु सुखद भएको त्यसलाई नजिकबाट नियालीरहेका भक्तपुर नेकपाका एक नेता सुरेश न्यौपाने बताउछन । आजबाट १७ बर्ष अघि २०५९ सालमा समाजवादको सांस्कृतिक र सामाजिक अभ्यास गर्ने उद्देश्यले तत्कालिन नेकपा एकता केन्द्र मसालको राजनीतिक कार्यदिशाअनुसार आधारशीला स्थापना भएको थियो । एकता केन्द्र मसाल पृष्ठभूमिकै नेताकार्यकर्ताका परिवार मिलेर आधारशीला खडा भएको हो ।

‘आधारशिला’ मा सामूहिक बसाइ मात्र छैन । यहाँको जीवनशैली पनि सामुहिक छ । सदस्यहरुको व्यक्तिगत सम्पति हुदैन । आधारशीलाले सबै सदस्यलाई उत्पादनसँग जोडेको छ । त्यसबाट हुने आयको भरमा नै आधारशीला चलिरहेको यसका सदस्य लोचन खतिवडाले जानकारी गराए । आधारशीलाका अगुवा रहेका मन्त्री पोखरेल आफै पनि सादगी नेता हुन् । उनको सम्पति भन्नु नै आधारशीला हो । राजनीतिमा लागेर हालसम्म अविवाहित नेता पोखरेलले आधारशीलालाई नै आफ्नो परिवार मानेका छन् । उनकै आदर्श पछ्याउदै ‘आधारशिला’ को नयाँ पुस्ता समाज रुपान्तरणका लागि आफ्नो व्यक्तिगत स्वार्थ त्यागेर लागिपरेको अर्का सदस्य ध्रुबराज कार्कीको भनाइ छ ।