२७माघ २०७६भक्तपुर । शिक्षा तथा मानव स्रोत विकास केन्द्रले अस्थायी शिक्षक र राहत दरबन्दीमा कार्यरत शिक्षक भिन्दाभिन्दै भएको जनाएको छ ।
सोमबार ७७ वटै शिक्षा विकास तथा समन्वय इकाइहरुलाई पत्र लेख्दै इकाईले अस्थायी शिक्षकको हकमा लागु हुने ऐनको व्यवस्था राहत शिक्षकको हकमा लागु नहुने जनाएको हो ।
प्रस्तुत विषयमा शिक्षा ऐन (संशोधन सहित) २०२८ को दफा ११ (च) को उपदफा (१) को खण्ड (ख) को प्रतिवन्धात्मक वाक्यांशमा उल्लिखित अस्थायी शिक्षक भन्ने वाक्यांशले राहत शिक्षकलाई नजनाउने र राहत शिक्षक कोटामा कार्यरत शिक्षकको हकमा सो ऐनको दफा ११च को उपदफा (१०) आकर्षित नहुने केन्द्रले लेखेको पत्रमा उल्लेख छ ।
सो सम्बन्धमा शिक्षा, विज्ञान तथा प्रविधि मन्त्रालयबाट माघ २४ गते मन्त्रीस्तरीय निर्णय भएकाले सो अनुसार कार्यान्वयन गर्न गराउन केन्द्रले इकाईहरुलाई निर्देशन दिएको छ ।
अस्थायी शिक्षकका सम्बन्धमा भएको व्यवस्थामा टेकेर जिल्लाहरुमा राहत दरबन्दीका शिक्षकहरुलाई हटाउन थालेपछि मन्त्रालयले यस्तो निर्णय गरेको हो ।
ऐनको दफा ११च को उपदफा (१०) मा के छ ?
(१०) उपदफा (१) को खण्ड (ख) को प्रतिबन्धात्मक वाक्यांश बमोजिमको विज्ञापनमा उम्मेदवार नहुने अस्थायी शिक्षक र त्यस्तो विज्ञापन बमोजिम लिइएको प्रतियोगितात्मक परीक्षामा छनौट हुन नसकेका अस्थायी शिक्षक प्रतियोगितात्मक परीक्षाको नतिजा प्रकाशित भएको मितिबाट स्वतः अवकास भएको मानिने छ ।
