भक्तपुर, ४ फागुनचीनको वुहान र आसपास फैलिएको नोभेल कोरोन भाइरस (कोभेड-१९) को महामारी पछि नेपाल फर्कन चाहेका १७५ जना नेपालीलाई सरकारले उद्धार गरी आइतवार बिहान भक्तपुरस्थित क्वारेन्टाइनमा ल्याइपुर्याएको छ । आफ्ना नागरीक उद्धार गर्न नसकेको चर्को आलोचनाका बीच आइतवार उनीहरुलाई उद्धार गरी भक्तपुर ल्याइपुर्याइएको हो ।
यस अघि वुहानबाट ल्याइने नेपालीलाई राख्ने निर्णय भए देखि नै असन्तुष्ट भक्तपुर आइतवार भने शान्त रहेको छ । बिहान त्रिभुवन विमानस्थल देखि खरिपाटीस्थित विधुत प्राधिकरणको तालिम केन्द्रमा कायम गरिएको क्वारेन्टाइनसम्म बिना अवरोध आफ्ना उद्धार गरिएका नागरिकलाई राख्न सरकार सफल भएको छ ।
उनीहरुलाई पर्यटक बसहरुमा राखेर विमानस्थलबाट बिहान करिब ४ बजे भक्तपुरतर्फ ल्याइएको थियो । खरीपाटीसम्म आइपुग्दा नबाटोमा न त क्वारेन्टाइन प्रवेश स्थलमा कतैपनि बिरोध प्रदर्शन नभएको भक्तपुरका सहायक प्रमुख जिल्ला अधिकारी दिलिप प्रसाद लामिछानेले जानकारि दिए । समाचारमा सुनिएको जस्तो बिरोध भक्तपुरमा नभएको भन्दै विद्यार्थी खुशी भएका र उनीहरुले सरकार र भक्तपुरका स्थानीयलाई धन्यवाद दिएका लामिछानेले बताए । उनीहरुले स्थानीयप्रति आभार ब्यक्त गरेका थिए ।
घर फर्किन चाहेका १८५ मध्ये ४ फर्कन नमानेका ६ जनामा शरीरको तापक्रम बढी देखिएपछि फर्कन नपाएका कारण १७५ जना आफ्ना नागरिक लिएर नेपाल वायु सेवा निगमको एयरबस ‘ए३३० अन्नपूर्ण’ विहान करिब ३:३०बजे काठमाडौं आइपुगेको थियो । वुहानबाट उद्धार गरिएकालाई खरीपाटीस्थित क्वारेन्टाइनमा र उनीहरुलाई लिन गएको जहाजका चालकसहित ‘क्याविन क्रु’लाई भने नगरकोटस्थित क्वारेन्टाइनमा राखिएको छ ।