भक्तपुर, ९ फागुन पूर्व प्रधानमन्त्री समेत रहेका नेपाल कम्युनिष्ट पार्टी (नेकपा) का अध्यक्ष पुष्प कमल दाहाल ‘प्रचण्ड’ले कम्युनिष्ट नेताहरु बोलीमा नभई व्यवहारमा आदर्श बन्नुपर्ने बताएका छन् ।कम्युनिष्ट नेताहरु निष्ठा र आदर्श बाट च्यूत बन्नु नहुनेमा जोड दिंदै उनले उक्त कुरा बताएका हुन् ।
शुक्रवार बिहान भक्तपुरको ठिमीमा आयोजित नेपाल कम्युनिष्ट पार्टीका संस्थापक नेता नारायणविलास जोशी स्मृति प्रतिष्ठानको भवन शिलान्यास कार्यक्रमलाई सम्बोधन गर्दै अध्यक्ष प्रचण्डले कम्युनिष्टहरु सत्तामा आएसंगै व्यक्तिगत स्वार्थमा लिप्त हुनु दुखद प्रवित्ति देखिएको बताए । ”सत्तामा नहुँदा, क्रान्तिमा हुँदा जनाताको भावना अनुरुप व्यवहार गर्ने नेताहरु सत्ता प्राप्त गरेपछि त्यो आदर्शबाट विचलित हुनु दुखद कुरा हो ।” उनले भने । कम्युनिष्ट नेताहरुले जनताको भावना र अपेक्षालाई घात गर्नु नहुने जिकिर गर्दै अध्यक्ष प्रचण्डले जनता जहाँ बस्छन् त्यहाँ बस्न, जनताले जे खान्छन् त्यही खान र जनता जे चाहन्छन त्यहि गर्न निर्देशन समेत दिए ।
कम्युनिष्ट पार्टीलाई यतिबेला पहिलेका जस्ता पूजीपतिको भन्दा आफ्नै नेतृत्वले संकटमा ल्याउने गरेको खुलासा गर्दै अध्यक्ष प्रचण्डले आफ्ना आदर्शबाट च्युत भएपछि नेतृत्व नै पार्टीको लागि घातक बन्ने गरेको बताए । ”पुँजीपति, सेना, बन्दुक केही पनि चाहिँदो रहेनछ कम्युनिष्ट नेता आफैंले आफैंलाई सिद्धाउने रहेछन् ।” अध्यक्ष प्रचण्डले प्रष्ट पारे ।
जेलनेल, यातना, भय र मृत्युलाई समेत परवाह नगरी जनताको पक्षमा लागेका र लडेका कम्युनिष्टहरु आदर्शबाट च्यूत हुनु नहुने जिजिर गर्दै उनले कम्युनिष्ट आदर्शको राजनीतिलाई फेरि एकपटक स्थापित गर्नुपर्नेमा जोड दिएका थिए ।
कार्यक्रममा बागमती प्रदेशका मन्त्री एवं सांसदहरु, पार्टीका केन्द्रीय सदस्यहरु, जिल्लाका नेतागण एवं स्थानीय जनप्रतिनिधिहरुका साथै नेकपा कार्यकर्ता एवं स्थानीय जनताको उपस्थिति रहेको थियो ।
