भक्तपुर, १२ फागुन सामाजिक सञ्जाल ‘टिकटक’ मा भिडियो बनाएपछि नेपाल प्रहरीका एक प्रहरी नायब निरीक्षक (सई) अप्ठ्यारोमा परेका छन् । प्रहरी बर्दीमै ‘टिकटक’ भिडियो बनाएपछि उनी बिबादमा तानिएका हुन् ।
‘टिकटक’ भिडियो बनाएर बिबादित बनेका प्रहरी नायब निरीक्षक रत्नबहादुर थापा हुन् । भक्तपुरको महानगरीय प्रहरी प्रभाग सुडालका प्रमुख नै रहेका थापाको भिडियो भाइरल भएपछि उनी बिबादमा परेका हुन् । उनलाई सोही कारण प्रभाग प्रमुखको जिम्मेवारीबाट हटाइएको छ ।
उनलाई आइतवार भक्तपुरबाट कारबाहीका लागि महानगरीय प्रहरी कार्यालय रानीपोखरी तानिएका छ भने उनको ठाउँमा रानीपोखरीबाटै अर्का सई राजु प्रसाईंलाई पठाइएको छ ।
सई थापाले एक महिलासंग मिलेर प्रहरी बर्दी र हतियार नै देखाएर टिकटक भिडियो बनाएको देखिएको छ । दिलु मगर ९१ आइडी भएकी उनै महिलाले भिडियो अपलोड गरेकी थिइन् । उनी सई थापाकी श्रीमती रहेको अनुसन्धानबाट खुलेको महानगरीय प्रहरी कार्यालयले रानीपोखरीले जनाएको छ ।
महानगरीय प्रहरी परिसर भक्तपुरका सूचना अधिकारी समेत रहेका डीएसपी दिपक गिरीले सई थापा रानीपोखरी तानिएको पुष्टि गरे । ” उहाँलाई महानगरीय प्रहरी कार्यालय रानीपोखरीले बोलाएको छ । थप कुरा त्यहीबाट जानकारी लिनुहोला ।” डीएसपी गिरीले भने ।
महानगरीय प्रहरी प्रमुख रहेका डीआईजी विश्वराज पोखरेलले आइतबार सई थापाविरुद्ध कारबाही प्रक्रिया अगाडि बढाइएको बताए । सामाजिक संजालमा भाइरल भएको ‘टिकटक’ भिडियोबारे थप अनुसन्धान भैरहेको उनको भनाई छ ।