दीर्घ दमखोकी रोगका विरामीहरुको लागि खुशीको खबर छ । भक्तपुरमा जापानी सहयोगमा निर्माणाधीन श्वासप्रश्वास पुन:स्थापना केन्द्रले उपचार शरु गर्ने भएको हो ।

जापान अन्तर्राष्ट्रिय चिकित्सा प्रविधि संस्था (जिम्टेफ) को प्राविधिक तथा आर्थिक सहयोगमा भक्तपुर नगरपालिका वडा नं. ९ तुमचोमा निर्माणाधीन श्वासप्रश्वास पुन:स्थापना केन्द्र संचालनको तयारी गरिएको छ । पहिलो चरणमा पुन:स्थापना केन्द्रको भवन निर्माण गरेको जिम्टेफले उपचार शुरु गर्न दोस्रो चरणको सम्झौता बुधबार सम्पन्न गरेको हो । ‘जिम्टेफ’ जापानका वरिष्ठ सरकारी चिकित्सकहरुको संस्था हो ।

नेपालस्थित जापानी राजदूत मसामिची साइगो र जिम्टेफका नेपाल प्रतिनिधि मायदानोरिको बीच काठमाडौस्थित राजदुतावासको कार्यालयमा दोस्रो चरणको सम्झौता सम्पन्न भएको र त्यसमा केन्द्रको भवन निर्माण तथा चिकित्सा उपकरण खरिद पश्चात नेपाली चिकित्सकहरुलाई उपचार सम्बन्धि तालिम दिने तथा जापानी विज्ञहरुको उपस्थितिमा उपचार गराउने विषय उल्लेख रहेको वडा नम्बर ९ का वडाध्यक्ष रवीन्द्र ज्याख्वले भक्तपुर पोस्टलाई जानकारी दिए ।

उक्त अवसरमा राजदुत मासामिची साइगोले जापानका वरिष्ठ सरकारी चिकित्सकहरुको संस्था जिम्टेफको सहगोगमा भक्तपुर नगरपालिकामा संचालन हुने केन्द्रले दुई देशका जनताबीचको सम्बन्धलाई थप सुमधुर पार्न विश्वास व्यक्त गरेका थिए । बढ्दो वायु प्रदुषणसंगै बढेको श्वासप्रश्वास सम्बन्धि दीर्घ रोगीहरुलाई यसले राहत मिल्ने राजदुतको भनाइ छ ।

जिम्टेफका नेपाल प्रतिनिधि मायदानोरिकोले भक्तपुरमा श्वासप्रश्वास पुन:स्थापना केन्द्र संचालनको तीनवर्षे योजना अन्तर्गत पहिलो वर्ष भवन निर्माण र उपकरण खरिद प्रकृया सफलतापूर्वक सम्पन्न भएको र दोस्रो वर्षमा नेपाली चिकित्सकहरुलाई यस उपचार विधिबारे तालिम संचालन गरी विरामीको उपचार शुरु गर्ने तयारी भइरहेको बताइन ।

कार्यक्रममा भक्तपुर नगरपालिका वडा नं. ९ का वडाध्यक्ष रविन्द्र ज्याख्वले केन्द्र स्थापनाका लागि भक्तपुर छनोट गरेकोमा आभार प्रकट गर्दै जन सहभागितामा उपभोक्ता समितिमार्फत लागत अनुमान भन्दा कम खर्चमा गुणस्तरीय भवन तयार भएको जानकारी गराएका थिए ।

कार्यक्रममा त्रिवि शिक्षण अस्पतालका वरिष्ठ डाक्टर एवं सोलिड नेपालकाकार्यकारी निर्देशक डा. खेमबहादुर कार्की लगायतले बोलेका थिए ।

पहिलो चरणको सम्झौता अनुरुप जिम्टेफले भक्तपुर नगरपालिकालाई केन्द्रको भवन निर्माण गर्न १ करोड ७० लाख रुपैया आर्थिक सहयोग निःशर्त अनुदान दिएको थियो । नगरपालिकाले आफ्नो ५ आना ३ पैसा ३ दाम क्षेत्रफलको जग्गामा दुइटा फरक फरक उपभोक्ता समिति मार्फत भवन निर्माण कार्य सम्पन्न गरेको वडाध्यक्ष ज्याख्वले जानकारी गराए ।

उक्त भवनमा दीर्घ दमखोकी रोगका विरामीहरुलाई जापानी फिजियोथेरापी विधिबाट उपचार सेवा प्रदान गरिने र त्यसकालागिआवश्यक चिकित्सकीय उपकरणहरु जडान गर्ने कार्य भइरहेको पनि उनले बताए । चैत्र ३ गते यसको उद्घाटन गर्ने योजना रहेको वडाध्यक्ष ज्याख्वले जानकारी दिए ।