भक्तपुर, २५ फागुनसत्तारुढ दल नेपाल कम्युनिष्ट पार्टी ( नेकपा ) को विद्यार्थी संगठन अखिल नेपाल राष्ट्रिय स्वतन्त्र विद्यार्थी यूनियन (अनेरास्ववियू) को भक्तपुर जिल्ला कमिटीले पूर्णता पाएको छ । उक्त युनियनको भक्तपुर जिल्ला संयोजक सुवास तिमिल्सिना र सह-संयोजक विराज थापाको संयुक्त बैठकले जिल्ला कमिटीलाई पूर्णता दिएको हो ।
सह-संयोजक बिराज थापाका अनुसार भक्तपुर जिल्ला कमिटी ६१ सदस्यीय बनेको छ । जसमा तत्कालिन अनेरास्ववियुबाट ३१ जना चयन भएका छन् भने बाँकी तत्कालीन अखिल (क्रान्तिकारी) बाट चयन भएका बताइएको छ ।
तत्कालीन अनेरास्ववियु र अखिल (क्रान्तिकारी) को एकतापछि बनेको नयाँ संगठनको भक्तपुर जिल्ला कमिटीलाई पूर्णता दिएको बैठकले सानोठिमी क्याम्पस र भक्तपुर बहुमुखी क्याम्पसका लागि नेतृत्व पनि चयन गरेको छ ।
भक्तपुर पोस्टलाई प्राप्त संगठनले जारी गरेको प्रेस बिज्ञप्ति अनुसार सानोठिमी क्याम्पसमा संयोजक प्रकाश केसी र सह संयोजक गोरख केसी चयन भएका छन् भने भक्तपुर बहुमुखी क्याम्पसमा संयोजक दिपक बहादुर बिष्ट र सह संयोजक कृष्ण रानाभाटलाई चयन गरिएको छ । उनीहरुलाई ५१ सदस्यीय क्याम्पस कमिटी बनाउन म्यान्डेट दिइएको छ ।
केन्द्रीय सदस्यहरु रमेश खड्का, जयराम बास्तोला, निश्चल ढुंगेल र पार्वती शर्मा सहित बसेको जिल्ला संयोजक तिमिल्सिना र सह-संयोजक थापाको संयुक्त बैठकले भक्तपुर जिल्ला कमीटीलाई पूर्णता दिएको र क्याम्पस कमिटीको नेतृत्व चयन गरेको हो । यस संगै अब भक्तपुरमा संगठनले गति लिने अनेरास्ववियुको भक्तपुर सह-संयोजक बिराज थापाले भक्तपुर पोस्टलाई बताए ।
हेर्नुस् प्रेस बिज्ञप्ति
