काठमाडौं । परीक्षामा थोरै अंक ल्याएको भन्दै विद्यार्थीलाई हात चिर्न लगाउने जागृती एकडेमी जडिबुटीकी शिक्षक सीतालक्ष्मी कर्मचार्यविरुद्ध अनुसन्धान गर्न ७ दिन म्याद थप भएको छ । जिल्ला अदालत काठमाडौँबाट आज शिक्षक कर्माचार्यविरुद्ध अनुसन्धानका लागि म्याद थपिएको हो ।

महानगरीय प्रहरी वृत्त, बानेश्वरको टोली कर्मचार्यविरुद्ध बालबालिका सम्बन्धी ऐन, २०७५ अनुसार कसुर गरेको दाबी गर्दै म्याद थपका लागि अदालत पुगेको थियो । अदालतले म्याद दिएपछि थप प्रमाण संकलन गर्ने तयारी प्रहरीले गरिरहेको प्रहरीले जनाएको छ ।

परीक्षामा कम नम्बर ल्याएको भन्दै शिक्षक कर्माचार्यले विद्यालयमा ६ र ७ कक्षाका विद्यार्थीलाई गत बिहीबार ब्लेडले नाडी चिर्न लगाएकी थिइन् । त्यसको भोलिपल्ट शुक्रबार अभिभावकहरू उजुरी गर्न विद्यालय पुगेका थिए । फागुन २३ गते विद्यार्थीलाई ब्लेडले चिर्न लगाउने शिक्षक कर्माचार्यलाई विद्यालय व्यवस्थापन समितिको निर्णयअनुसार बर्खास्त गरिएको थियो । प्रहरीले यातना भोगेका विद्यार्थीका अभिभावक र एकेडेमीका प्रिन्सिपल राजनकुमार श्रेष्ठलाई वृत्तमा बोलाएर घटनाबारे जानकारी लिइसकेको छ।

बालबालिकासम्बन्धी ऐन २०७५ को दफा ६६ अनुसार विद्यार्थी बालबालिकालाई कुनै यातना धम्की वा डर देखाउन पाइने छैन । त्यस्तो कसुर गरेको पाइए ५० हजारसम्म जरिवाना र एक वर्ष कैद हुने व्यवस्था छ। कसुर गर्ने आरोपितलाई निजी संघसंस्था वा बालबालिकासम्बन्धी प्रत्यक्ष सरोकार राख्ने निकायले १० वर्षसम्म काममा बन्देज लगाउने व्यवस्था छ। यस्तो मुद्दा जिल्ला अदालतअन्तर्गतको बाल इजलासमार्फत सजाय हुनेछ।