भक्तपुर, २९ फागुन । डिभिजन वन कार्यालय दोलखाका प्रमुखलाई अख्तियार दुरुपयोग अनुसन्धान आयोगको टोलीले पक्राउ गरेको छ । भक्तपुरको गठ्ठाघरबाट उनलाई पक्राउ गरिएको हो ।
पक्राउ पर्ने डिभिजन वन कार्यालय दोलखाकी प्रमुख सन्तमाया श्रेष्ठ रहेको अख्तियारले जनाएको छ । एक सेवाग्राहीसँग घुस लिएर दोलखा बाट हिडेको खबर आएपछि उनलाई निगरानीमा राखेको अख्तियारको टोलीले भक्तपुरको गठ्ठाघरमा गाडी र घुस रकमसहित पक्राउ गरेको हो । उनको साथबाट २ लाख ४ हजार नगद समेत बरामद गरेको अख्तियारका एक अनुसन्धान अधिकृतले भक्तपुर पोस्टलाई जानकारी दिए । आज बिहीबार साँझ ६ बजेतिर श्रेष्ठलाई गठ्ठाघरमा उनी चढेको बा१झ ७६८५ नम्बरको गाडी नियन्त्रणमा लिएर उनको साथमा रहेको रकम बरामद गरेको उनले जानकारी दिए । अख्तियारले अनुसन्धान गरिरहदा हेर्ने सर्वसाधारणको भीड लागेको छ ।
अख्तियारको टोलीले ६ बजे उनलाई नियन्त्रणमा लिएर उनको साथमा रहेको सबै सामानको मुचुल्का समेत उठाइरहेको छ । उनलाई नियन्त्रणमा लिएको र थप आवश्यक अनुसन्धान हुने अख्तियार टोलीले जनाएको छ ।
तस्वीर : भक्तपुर पोस्ट