नयाँ वर्षसंँगै मनाइने ऐतिहासिक एवं सांस्कृतिक महत्व बोकेकोे भक्तपुरको बिस्केट जात्रा यस वर्ष कसरी मनाउने भन्ने विषयमा बिचारबिमर्स शुरु भएको छ । कोभेड १९ को अन्तराष्ट्रिय माहामारी र नेपालमा रोग भित्रिन सक्ने जोखिमका बीच लिच्छवीकालीन बिस्केट जात्रालाई कसरी निरन्तरता दिने भन्ने विषयमा चासो र चिन्ता व्यक्त गरिएको छ ।

भक्तपुर नगरपालिकाको आयोजनामा बिहीवार बिस्केट जात्रा व्यवस्थापनसम्बन्धी सरोकारवालाहरुसँग छलफल कार्यक्रम सम्पन्न भयो । कार्यक्रमम प्रमुख बक्ताको रुपमा रहेका नगर प्रमुख सुनिल प्रजापति, प्रमुख जिल्ला अधिकारी हुमकला पाण्डे, प्रहरी उपरीक्षक सविन प्रधान त्यसैगरी वडाध्यक्ष कुमार चवाल र राजकृष्ण गोरा,गुठी संस्थान भक्तपुरका प्रमुख आनन्द कर्माचार्य सहभागीहरु रामबहादुर प्रजापति, केशव तमखु, न्हुछेराम भेले, गोविन्द मल्ल लगायतले कोरोना भाइरसको त्रासले गर्दा यस वर्ष बिस्केट जात्रा चुनौतीपूर्ण भएको भनेका थिए । सरकारले पच्चीस जना भन्दा बढी भेला नहुन उर्दी जारी गरेको अवस्थामा जात्रा मनाउनु चुनौती भएको उनीहरुको भनाइ छ ।

बिस्केट जात्रा सञ्चालन सम्बन्धी आवश्यक निर्णय लिन नगर प्रमुख सुनिल प्रजापतिको संयोजकत्वमा एक कार्यदल नै गठन गरिएको छ । उक्त कार्यदल १० सदस्यीय बनेको नगरपालिकाले जनाएको छ ।  कार्यदलको निर्णयानुसार  जात्रा व्यवस्थापन गरिने बताइएको छ । यस अघि चैत ४ देखि ८ गते सम्मका लागि तय भएको भक्तपुर महोत्सव कोरोनाकै कारण स्थगित गरिएको थियो । बिस्केट जात्राका लागि भने अझै समय रहेकोले त्यस बेला सम्म कोभेड १९ को प्रकोप अन्त्य हुने आशा गरिएको छ ।

कार्यदलका सदस्यहरु यस प्रकार रहेका छन् :
१. संयोजक – सुनिल प्रजापति
२. सदस्य – प्रमुख जिल्ला अधिकारी
३. सदस्य – भनपा वडा नं. ४ का वडाध्यक्ष
४. सदस्य – भनपा वडा नं. ५ का वडाध्यक्ष
५. सदस्य – जिल्लाका सुरक्षा निकाय प्रमुखहरु
६. सदस्य – भक्तपुर विद्युत प्राधिकरण प्रमुख
७. सदस्य – भक्तपुर दूर सञ्चार प्रमुख
८. सदस्य – खानेपानी तथा सरसफाइ डिभिजन प्रमुख
९. सदस्य – भैरवनाथ जात्रा सहयोग समिति
१०. सदस्य – भैरवनाथ गुठी नाइके