८ चैत २०७६भक्तपुर । नेपाल सरकारले घोषणा गरेको प्रतिबन्ध उल्लंघन गर्दै विभिन्न मुलुकबाट शनिबार स्वदेश फर्किएका ६३ नेपालीलाई सिधै भक्तपुरको खरिपाटीस्थित क्वारेन्टाइनमा पुर्याइएको छ ।
अध्यागमन विभागकाअनुसार थाइ एयरवेजले ४९ र एयर इण्डियाले १२ जना नेपालीलाई त्रिभुवन अन्तर्राष्ट्रिय विमानस्थलमा ल्याएका थिए ।
प्राणघातक कोरोना भाइरस (कोभिड १९) संक्रमणको जोखिम न्यूनिकरणका लागि सरकार लगाएको प्रतिबन्धविपरीत विदेशी एयरलाइन्स कम्पनीले बेकेर ल्याएका ५ महिलासहित ६३ नेपालीलाई खरिपाटी क्वारेन्टाइनमा राखिएको हो ।
स्वदेश आएका ६३ नेपालीलाई विमानस्थलबाट साझा बसमा खरिपाटी पुर्याइएको थियो । अनुमतिबिना नेपाल आएकाहरु उनीहरु अब अब १४ दिन क्वारेन्टाइनमा बस्नुपर्नेछ। उनीहरु आफैले नै त्यसका लागि सबै खर्च व्यहोर्नुपर्ने छ। खरिपाटीमा नेपाली सेनाले हेल्थ डेक्स सुरु गरिसकेको छ ।
बुधबार सरकारले युरोपका सबै मुलुक, पश्चिम एसियालगायत खाडी मुलुक, इरान, टर्की, मलेसिया, दक्षिण कोरिया, जापानका नागरिकलाई चैत ७ गतेदेखि वैशाख ३ गतेसम्मका लागि आगमनमा प्रतिबन्ध लगाएको थियो।
खरिपाटीमा यसअघि चीनबाट ल्याइएका नेपालीलाई क्वारेन्टाइनमा राखिएको थियो ।