पूर्वराजा ज्ञानेन्द्र शाहले निजी अस्पतालप्रति असन्तुष्टि पोखेका छन् । निजी अस्पतालले कोरोना भाइरस संक्रमणको आशंका भएका बिरामीलाई समेत उपचार गर्न अस्वीकार गरेपछि उनले असन्तुष्टि जनाएका हुन् ।

सामाजिक सञ्जाल ट्वीटरमार्फत पूर्वराजा शाहले संकटका बेला पछि हट्नेहरु कायर भएका भन्दै कोरोनाको आशंकामा उपचार नगर्नु कायरतापूर्ण हुने भनेका छन् । सरकारी मात्र नभई निजीस्तरका स्वास्थ्य संस्थालेसमेत संकटका बेला पछि हट्नु नहुने उनको भनाइ छ ।

पूर्वराजा शाहले ट्वीटरमा लेखेका छन्‌, ‘कोरोना भाइरसको बढ्दो प्रभावले संकटमा रहेका बेला देश भित्र संचालनमा रहेका सरकारी मात्र नभै सबै निजीस्तरका स्वास्थ्य संस्थाले समेत आम नागरिकलाई पहिलो प्राथमिकता दिनै पर्छ, संकटका बेला पछि हट्नु, कुनै भेदभाव गर्नु कायरतापूर्ण हुनेछ । यो संवेदनशीलतालाई सरकारले पनि मनन गर्नुपर्छ ।’