विश्वव्यापी महामारीकाे रुपमा फैलिएकाे नोभल काेराेना भाइरस(covid 19)को राेकथाम र नियन्त्रणकाे लागि सूर्यविनायक नगरपालिकाले ९ बुँदे निर्णय गरेको छ । देश बन्दाबन्दी(lock down)मा रहेको चौथो दिन नगरपालिकाले ९ बुँदे निर्णय लिएको हो ।

शुक्रवार नगर प्रमुख वासुदेव थापाको अध्यक्षतामा बसेको बैठकले काेभिड-१९ राेकथाम र नियन्त्रणकाे लागि ९ बुँदे कार्ययोजना अघि सारेको बैठकमा सहभागी वडा अध्यक्ष रविन्द्र सापकोटाले बताए । उक्त बैठकमा पूर्वमन्त्री समेत रहेका प्रतिनिधि सभा सदस्य महेश बस्नेत,उपमेयर जुना बस्नेत,प्रमुख प्रशासकीय अधिकृत कमल ज्ञवाली,वीरदल गणका प्रमुख कर्णेल शिव प्रसाद पाैडेल र नगरपालिका सबै वडा अध्यक्षहरुकाे सहभागिता रहेको बताइएको छ ।

बैठकपश्चात प्रमुख प्रशासकीय अधिकृत कमल ज्ञवालीद्रारा प्रेषित नगरपालिकाको सूचनामा नगर भित्र १ सय बेड क्षमताको क्वारेन्टाइन स्थल यकिन गरिएको,सुरक्षा सामाग्री तैनाथी अवस्थामा राखिएको लगायत जानकारी गराउनुका साथै कोभिड १९ को शंका लागेमा वा यसबारे सहयोग आवश्यक भएमा १२ जना सम्पर्क व्यक्तिहरु पनि सार्वजनिक गरिएको छ । नगर अस्पतालका २ डाक्टर सहित नगरपालिकाले १२ सम्पर्क व्यक्ति सार्वजनिक गरेको हो । सर्वसाधारणले उनीहरुसंग मोबाइलमै सम्पर्क गर्न मिल्ने गरी मोबाइल नम्बर नै सार्वजनिक गरिएको छ ।
हेर्नुस् सम्पर्क व्यक्तिहरु

नगरपालिकाको सूचनामा लकडाउनको पूर्ण पालना गर्न अनुरोध गर्दै श्रमिक वर्गलाई दैनिक उपभोग्य सामाग्री अभाव भएमा वडा अध्यक्षले उपलब्ध गराउने, आपूर्ती व्यवस्थालाई सहज बनाउन अनुगमनलाई प्रभावकारी बनाइने बताइएको छ । त्यसैगरी सेल्फ क्वारेन्टाइनमा बस्न नमान्नेलाई नगरपालिकाको क्वारेन्टाइनमा राखिने, वडागत रुपमा घरपरिवारको विवरण संकलन गरी सेवा प्रवाहलाई सहज बनाउने लगायतका कार्ययोजना बनाइएको सूचनामा भनिएको छ ।

सच्याइएको : १२ सम्पर्क व्यक्ति हुनुपर्नेमा अन्यथा भएकोले सच्याइएको छ । सम्पादक