जगातीस्थित महानगरीय प्रहरी वृत्तका प्रमुख रहेका प्रहरी नायव उपरीक्षक चक्रराज जोशीले प्रेस संगठन नेपालप्रति आभार प्रकट गरेका छन् । संगठनको भक्तपुर जिल्ला कमिटीले सल्लाघारीको तीनकुनेस्थित महानगरीय प्रहरी पोस्टमा कार्यरत प्रहरीहरुका लागि हात धुने पानीको व्यवस्था गरिदिएपछि उनले आभार प्रकट गरेका हुन् ।

शुक्रवार बिहान प्रेस संगठन नेपाल, भक्तपुर जिल्ला कमिटीका संयोजक कविता थापा र सह संयोजक संजीप घिमिरे ‘शुभचिन्तक’को नेतृत्वमा प्रहरी कर्मचारीका लागि हात धुने पानीको व्यवस्था गरिएको हो । उक्त अवसरमा जिल्ला कमिटीका सदस्यहरु विरेन चम्लागाई र आशिष पौडेलसमेत उपस्थित रहेका थिए । प्रहरी पोस्टमा माछापुच्छ्रे बैंक र नागरिक हेल्थ ट्रस्ट फन्डको सहयोगमा पाँच सय लिटरको पानी ट्यांकी जडान गरिएको जिल्ला कमिटीका सदस्य विरेन चम्लागाईले बताए । सिमित व्यक्तिको उपस्थितिमा दुरी व्यवस्थापन सहित पानी ट्यांकी प्रहरीलाई हस्तान्तरण गरिएको थियो । महानगरीय प्रहरी वृत्त जगातीका प्रमुख प्रहरी नायव उपरीक्षक चक्रराज जोशीले साबुन पानीले हात धोएर उक्त पानी ट्यांकीको उद्घाटन गरेका थिए ।

कोरोना भाइरसको सन्त्रास बीच मास्क र पन्जा बिना नै कार्यस्थलमा खटिरहेका प्रहरी कर्मचारी देखेपछि हात धुने व्यवस्था मिलाइएको प्रेस संगठन नेपाल, भक्तपुर जिल्ला कमिटीको संयोजक कविता थापाले बताइन् । ”फिल्डमा खट्ने प्रहरीमा कोरोना प्रतिको डर पायौं । जनसेवामा खटेका प्रहरीको लागि सानो सहयोग गर्न पाउँदा खुशी छौं ।” संयोजक थापाले भनिन् ।

महानगरीय प्रहरी प्रभाग कटुन्जेका प्रमुख एवं प्रहरी नायव निरीक्षक ज्योति कार्की त्यसैगरी प्रहरी सहायक निरीक्षक मनोज सर्राफ लगायतले पत्रकार र प्रहरी फिल्डमा संगसंगै रहने हुँदा एक अर्काको सहयोगी भएको भन्दै यसले सम्बन्धलाई थप मजबुद बनाउने बिस्वास व्यक्त गरेका थिए ।  प्रहरी जवान प्रविन कट्टेलले पानी ट्यांकी पाएसंगै बेलाबेलामा हात धुन र मनोबैज्ञानिक रुपमा बलियो बन्न सघाउ पुग्ने बताए ।”अरुलाई हात धुनुपर्छ भन्ने तर आफै हात धुन नपाउने अवस्थाको अन्त्य भएको छ । यसले मनोबैज्ञानिकरुपमा हामीलाई बलियो बनाएको छ ।” उनले भने । कोरोना भाइरस संक्रमणबाट बच्न विश्व स्वास्थ्य संगठनले साबुन पानीले हात धोइरहन सिफारिस गरेको छ ।

विश्वव्यापी महामारीको रुपमा फैलिएको नोभल कोरोना भाइरस(कोभिड १९)का कारण देश बन्दाबन्दी(लकडाउन) मा रहँदा अनावश्यक काममा बाहिर निस्कनेलाई नियन्त्रण गर्न सुरक्षाकर्मी तैनाथ गरिएका छन् । बन्दाबन्दीको चौथो दिनसम्म पनि भक्तपुरका अधिकांश तल्लो तर्जाका प्रहरीहरु मास्क र पन्जा बिना नै कार्यस्थलमा खट्नु पर्दा रोगको जोखिममा रहेका छन् ।