भक्तपुर, २० चैतभक्तपुरका सहकारी संस्थाहरुले कोरोना भाइरस (कोभिड १९) बाट बच्न जनचेतना जगाउने भएका छन् । सहकारी संस्थाहरुले घर घरमा रहेका आफ्ना शेयर सदस्यहरुमार्फत जनचेतना जागृत गराई कोरोना बिरुद्ध लड्न जागरुक र जिम्मेवार बनाउने भएका हुन् ।
नगर प्रमुख सुनिल प्रजापतिले जिल्ला सहकारी संघका प्रतिनिधिलाई बोलाइ १५६ वटा सहकारीमा रहेका झण्डै १ लाख सदस्यहरुलाई सुसूचित गर्नका साथै संकटका बेला सहयोग गर्न भनेपछि उनीहरुले उक्त कार्यका लागि तत्परता देखाएका हुन् ।
उक्त अवसर जिल्ला बचत तथा ऋण सकारी संघका अध्यक्ष कृष्णगोविन्द लाखाजुले आफ्ना सम्पूर्ण सदस्यहरुलाई घर–घरमा सन्देश पु¥याउने र समस्यामा परेकाहरुलाई आर्थिक सहयोग समेत गर्ने स्पष्ट पारे । ”यो संकटका बेला सदस्यलाई आवस्यक भए केही रकम पनि उपलब्ध गराउछौं ।” उनले भने ।
नगर प्रमुख प्रजापतिले खुद्रा व्यापार संघ र भक्तपुर घरेलु तथा साना उद्योग संघसंग समेत सहयोगका लागि अपिल गरे । ती सस्थाका प्रतिनिधिले आफूहरु खाद्यान्न लगायतका अति आवश्यक वस्तु उत्पादन र आपूर्ति गर्न प्रतिवद्ध रहेको बताएका थिए ।भक्तपुर घरेलु तथा साना उद्योग संघका अध्यक्ष बिरेन्द्र जतिले लघु घरेलु तथा साना उद्योगबाट उत्पादित ताइचिन चिउरा, लोकल चामल, विभिन्न मसला, दाल, तोरी, घ्यु इत्यादि खाद्यान्न सहज आपूर्ति र संघसँग आबद्ध उद्योग निर्वाध रुपमा सञ्चालनको नगरपालिका तर्फबाट आवश्यक सहयोग हुने विश्वास व्यक्त गरेका थिए ।
छुट्टाछुट्टै बैठकमा मेयर प्रजापतिले कोरोनाबिरुद्द लड्नु साझा जिम्मेवारी भएको भन्दै सबै मिलेर कोरोना भाइरसको संक्रमणबाट समाजलाई जोगाउन लाग्नुपर्नेमा जोड दिएका थिए ।
