दुधपाटीस्थित भक्तपुर अस्पतालले पनि कोरोना भाइरस (कोभिड १९) को परीक्षण शुरु गरेको छ । यस अघि स्वाब संकलन गरी टेकु पठाउँदै आएको भक्तपुर अस्पतालले आज आइतवारबाट आफैं परीक्षण कार्य शुरु गरेको हो ।

अस्पतालको मेडिकल सुपरिटेण्डेण्ट डा सुमित्रा गौतमका अनुसार आइतवार सोह्र जना शंकास्पद बिरामीको कोरोना टेस्ट भएको छ । र्‍यापिड डिटेक्सन टेस्टमार्फत परीक्षण भएको हाे । यसरी टेस्ट गर्दा १५ मिनेटमै रिजल्ट प्राप्त हुने बताइएकाे छ । आज टेस्ट गरिएका सबैमा कोरोना नेगेटिभ देखिएको जानकारी प्राप्त भएकाे छ । डा गौतमका अनुसार यी किट बागमती प्रदेश सरकारको सामाजिक विकाश मन्त्रालय अन्तर्गत स्वास्थ्य निर्देशनालयले पठाएको हो । निर्देशनालयले १ सय र्‍यापिड डिटेक्सन किट पठाएको छ भने थप २ सय किट पठाउने जानकारी गराइएको छ । भक्तपुर अस्पताल बागमती प्रदेश सरकार मातहत संचालित अस्पताल हो ।

मेडिकल सुपरिटेण्डेण्ट डा. गौतमले भक्तपुर पोस्टलाई जानकारी गराए अनुसार अस्पतालले अहिलेसम्म १७० जनाको स्वाब संकलन गरी राष्ट्रिय प्रयोगशाला टेकु पठाएकोमा १०४ जनाको रिपोर्ट नेगेटिभ आएको छ भने अन्यको रिपोर्ट आउने क्रममा रहेको छ । उनले कोरोना आशंकामा अस्पताल आउनेक्रम बढेसंगै आइसोलेसन बेड पनि बढाइएको बताइन् । भक्तपुर अस्पतालमा अहिले आइसोलेसन बेडको संख्या १० रहेको डा गौतमले जानकारी गराइन् ।