भक्तपुर, १ बैशाखसत्तारूढ दल नेपाल कम्युनिष्ट पार्टी (नेकपा)का प्रवक्ता समेत रहेका राष्ट्रिय सभा सदस्य नारायणकाजी श्रेष्ठले आफ्नो एक वर्षकै तलब दान दिने घोषणा गरेका छन् । राष्ट्रिय सभा सदस्य वापत आफूले पाउने एक वर्षको पारिश्रमिक उनले कोरोना रोकथाम तथा नियन्त्रण कोष र विपन्न वर्ग केन्द्रीत राहत प्याकेजमा दिने घोषणा गरेका हुन् ।
नेकपा प्रचार बिभाग प्रमुख समेत रहेका सचिवालय सदस्य श्रेष्ठले सोमबार सामाजिक संजाल मार्फत यस्तो घोषणा गरेका गरेका हुन् । विहानै ट्विट गर्दै नेता श्रेष्ठले एक वर्षको पारिश्रमिक मध्ये २ महिनाको पारिश्रमिक कोरोना कोषमा र बाँकी १० महिनाको पारिश्रमिक विपन्न वर्ग केन्द्रीत आर्थिक राहत प्याकेजका लागि दिने बताएका छन् ।
आफ्नो ट्विटमा उनले लेखेका छन् ‘हामी अहिले कोभिड-१९ र उत्पन्न सँकटको सामना गरिरहेका छौं।यसबेला एकताबध्द भई आ-आफ्नो ठाँउबाट भुमिका खेल्नु जरुरी छ। यस स्थितिमा मैले राष्ट्रिय सभा सदस्यको एक बर्षको पारिश्रमिक मध्ये २ महिनाको कोभिड-१९ कोष र बाँकी बिपन्न बर्ग केन्दृत आर्थिक राहात प्यकेजका लागि दिने घोषणा गर्दछु।”
‘यसअघि वर्षौं सांसद नहुँदा पनि आफ्नो घर व्यवहार चलिरहेको भन्दै उनले आफूले प्राप्त गर्ने पारिश्रमिक नलिने बताए । घर भाडा, गाडी र तेल खर्च पार्टीले दिँदै आएको छ ‘खानासहितको सामान्य खर्च दाजुभाइ र साथीहरुले दिन्छन । मानव चोला लिनको लागि भन्दा दिनको लागि हुनुपर्छ ।’ भक्तपुर पोस्ट संग उनले भने । नयाँ वर्षमा आफूले गरेको घोषणाले आत्मा सन्तुष्टि प्राप्त भएको उनको भनाइ छ ।