मध्यपुर थिमि, १७ जेठतस्बिर : सांकेतिक
लकडाउनका बेला बैंकको एटिएम फुटाइ पैसा चोर्न खोज्ने एक युवक पक्राउ परेका छन् । भक्तपुरको मध्यपुर थिमि नगरपालिका वडा नं. ६ बाहखा बजार स्थित एनआइसी एसिया बैंकको एटिएम फुटाउदै गरेको अवस्थामा एक युवक पक्राउ परेका हुन् ।
प्रहरीका अनुसार पक्राउ पर्नेमा सिन्धुपाल्चोकको कदम्बास घर बताउने २१ वर्षीय सचिन तामाङ रहेका छन् । उनी नगदेशमा अस्थायी बसोबास गर्दै आएका युवक भएको प्रहरीको भनाइ छ । उनलाई महानगरीय प्रहरी वृत्त थिमिका प्रहरी निरीक्षक राजिव गिरीको कमाण्डमा रहेको प्रहरी गस्ती टोलीले शुक्रवार पक्राउ गरेको महानगरीय प्रहरी परिसर भक्तपुरका डीएसपी दीपक गिरीले जानकारी गराए ।
प्रहरीले तामाङको साथबाट १ थान ह्याम्बर,१ थान स्क्रु ड्राईभर, मेसिनको बाहिरी कभर र रोलर (डण्डी) लगायत बरामद गरेको बताइएको छ । तामाङलाई नियन्त्रणमा लिई महानगरीय प्रहरी वृत्त थिमिले थप अनुसन्धान कार्य अगाडी बढाएको डीएसपी गिरीले जानकारी दिए ।