प्राविधिक शिक्षा तथा व्यावसायिक तालीम परिषद(सीटीईभीटी) का नव नियुक्त उपाध्यक्ष खगेन्द्र प्रसाद अधिकारीले पदभार ग्रहण गरेका छन् । सोमबार उनले सीटीईभीटीको सानोठिमीस्थित कार्यालयमा पदभार ग्रहण गरेका हुन् ।

प्रा डा कुलबहादुर बस्नेतको कार्यकाल पुरा भएपछि रिक्त उपाध्यक्ष पदमा लामो समय सम्म नियुक्ति हुन सकेको थिएन । असार २ गते बसेको मन्त्रिपरिषद बैठकले अधिकारीलाई सीटीईभीटीको उपाध्यक्षमा नियुक्त गरेको हाे । अधिकारी निजी प्राविधिक शिक्षालयहरुको छाता संगठन फोरम फर हेल्थ एण्ड टेक्निकल साईन्सका निवर्तमान अध्यक्षसमेत हुन् । झापा स्थायी घर भएका अधिकारी प्रधानमन्त्री केपी शर्मा ओली निकट मानिन्छन् ।

सोमबार पदभार ग्रहण पछि उपाध्यक्ष अधिकारीले सीटीईभीटीद्वारा आयोजित स्वागत कार्यक्रमलाई सम्बोधन गर्दै सीटीईभीटीलाई कमजोर पार्न भइरहेका क्रियाकलापप्रति आफू जानकार रहेको र यसको गुणस्तरमा सुधार गरी ति सबै कुटिल क्रियाकलापलाई निस्तेज गर्ने बताएका थिए । उनले परिषद् भित्र कर्मचारीहरुबीच एकताको भाव पैदा गराउँदै अनियमितता अन्त्य गर्ने र विगतका कमजोरीबाट शिक्षा लिएर नयाँ शिराबाट परिषदलाई माथि उठाउने प्रतिबद्धता समेत प्रकट गरे ।

कार्यक्रममा सदस्य सचिव डा. पुष्परमण वाग्लेले आफ्नो भित्री स्वार्थ पूरा गर्न सदस्य सचिव र उपाध्यक्ष बीच कार्यमा अन्तरविरोध सृजना गराउने जुनसुकै क्रियाकलापहरूलाई मिलेर सबक सिकाउनु पर्ने आवश्यकता औल्याएका थिए भने अन्य बक्ताहरुले उपाध्यक्षको कार्यकाल अविष्मरणीय रहने विश्वास व्यक्त गरेका थिए । प्रशासन निर्देशक जीवनारायण काफ्लेले स्वागत मन्तव्य राखेका उक्त कार्यक्रमको संचालन भने उप निर्देशक रोहित दहालले गरेका थिए।