भक्तपुर, २५ असारनेपाल मजदुर किसान पार्टीका कार्यकर्ता एवं भक्तपुर नगरपालिका साविक वडा नं. १२ का पूर्व वडाध्यक्ष प्रद्युम्न प्रजापतिको श्रद्धाञ्जली सभा सम्पन्न भएको छ ।
नेपाल मजदुर किसान पार्टी ४ नं. वडा समन्वय समितिको आयोजना एवम् नेमकिपाका केन्द्रीय सदस्यसमेत रहेका भक्तपुर नगरपालिकाका प्रमुख सुनिल प्रजापतिको प्रमुख अतिथ्यतामा विहीबार बिहान श्रद्धाञ्जली सभा सम्पन्न भएको हाे ।
प्रद्युम्न प्रजापति प्रति श्रद्धाञ्जली ब्यक्त गर्दै नगर प्रमुख सुनिल प्रजापति उनीले व्यक्तिगत फाइदाको निम्ति कहिल्यै कुरा नगर्ने स्वभावको एक निःस्वार्थभावले देश र जनताकाे सेवामा समर्पित योद्धा भएको स्मरण गरेका थिए ।
नेमकिपा वडा नं. ४ समन्वय समितिका कृष्ण गोविन्द दुवालको सभापतित्वमा सम्पन्न उक्त सभामा नेमकिपा भक्तपुर नगरसमितिका अध्यक्ष नारायण बहादुर दुवाल, वडा नं. ४ का वडाध्यक्ष कुमार चवाल, स्थानीय न्हुछेराम भेले र राजाराम चवाल लगायतले उनी धनी कुलमा जन्मेर पनि शोषित पीडित जनताको पक्षमा काम गर्ने एक सच्चा सेवक भएकाे भन्दै उनका असल कुराहरुको अनुशरण गर्नुपर्नेमा जोड दिएका थिए ।
पूर्ववडाध्यक्ष प्रजापतिको ७२ वर्षको उमेरमा शनिबार राति निधन भएकाे थियाे । उनका श्रीमती, दुई छोरा र दुई छोरी छन् ।