भक्तपुर, ११ साउनलागुऔषध मुद्दामा भक्तपुर जिल्ला अदालतबाट सजाय भएपछि फरार भएका धन भन्ने दिपक श्रेष्ठ पक्राउ परे लगत्तै जेल चलान भएका छन् ।
सिन्धुपाल्चोकको ईन्द्रवती गाउँपालिका वडा नं ९ भोटसिपा घर भई हाल भक्तपुरको सूर्यविनायक नगरपालिका वडा नं ५ बस्ने धन भन्ने दिपक श्रेष्ठलाई गत असारमा भक्तपुर जिल्ला अदालतले २ बर्ष कैद र १ लाख रुपैया जरिवाना फैसला गरेको थियो । उनी फरार भएपछि फैसला कार्यान्वयन हुन सकेको थियन । फरार रहेको श्रेष्ठलाई खोज्न खटिएको महानगरीय प्रहरी परिसर भक्तपुरको प्रहरी टोलीले आज आइतवार उनलाई पक्राउ गर्न सफल भएको थियो ।
पक्राउ परेलगत्तै श्रेष्ठलाई भक्तपुर जिल्ला अदालतमा पेश गरेकोमा फैसला कार्यान्वयनको लागि सुन्धारास्थित केन्द्रीय कारागार जगन्नाथदेवल पठाउने आदेश भए अनुसार केन्द्रीय कारागार पठाईएको डिएसपी दिपक गिरीले जानकारी दिए ।
डिएसपी गिरीका अनुसार चोरी मुद्दामा जरिवाना फैसला भएपछि करिब पाँच वर्षदेखि फरार सूर्यविनायक ३ बस्ने सुरेश देशेमरु र सवारी अंगभंग मुद्दाका जरिवाना फैसला भएपनि फरार सूर्यविनायक ५ कटुन्जे बस्ने सुजन मनसुर कसपाललाई पनि आईतवार फैसला कार्यान्वयनका लागि जिल्ला अदालतमा पेश गरिएको थियो । देशेमरु २० हजार र कसपाल १० हजार जरिवाना तिरी छुटेका छन् ।