थिमि, १२ साउनअमेरिका लैजाने प्रलोभनमा पारी रकम ठगी गरेको अभियोगमा भक्तपुर बस्ने २ युवतीहरु प्रहरीको फन्दामा परेका छन् । महानगरीय अपराध महाशाखा मिनभवनबाट खटिएको प्रहरी टोलीले उनीहरुलाई पक्राउ गरेको हो ।
पक्राउ पर्नेहरुमा भक्तपुर रोजभिलेज कोलोनी बस्ने बाग्लुङ काठेगाँउपालिका-२ स्थायी ठेगाना भएका २७ वर्षीया कोपिला शर्मा र १९ वर्षीया अमिसा केसी रहेका छन् ।
उनीहरुले आफूहरु अमेरिकाको डिभी परी अमेरिकाको क्यालिफोर्नियामा बस्दै आएको बताउदै बिहे गरी अमेरिका लैजाने प्रलोभनमा पारी ६ लाख ६० हजार रुपैयाँ ठगी गरेको प्रहरीको भनाइ छ ।
उनीहरुले भक्तपुरकै व्यक्तिलाई अमेरिका लैजाने प्रलोभन देखाई पिडितसंग विभिन्न बहानामा पटक/पटक गरी ५ लाख रुपैयाँ ठगी गरेको तथा शर्माले भक्तपुरको एक पीडितको छोरीसँग मितेरी लगाई अमेरिका लैजाने बिश्वास दिलाई थप १ लाख ६० हजार रुपैयाँ ठगी गरेको प्रहरी अनुसन्धानबाट खुलेको बताइएको छ ।
२७ वर्षीया कोपिलाले निक्की पौडेलको नाममा फेक आइडी समेत खोलेको र फिल्म क्षेत्रका ब्यक्तिहरुलाई समेत आफूसँग बिहे गरेमा अमेरिका लैजाने भनी ठगी गर्न खोजेको अनुसन्धानबाट खुल्न आएको महानगरीय अपराध महाशाखाले जनाएको छ । प्रहरीका अनुसार उनीहरुले फेसबुक, टिकटकमार्फत फलो गर्ने र बिहे गरी अमेरिका लैजाने भन्दै ठगी गर्ने गरेका थिए । ठगी गरी फरार उनीहरुलाई अपराध महाशाखाकाे टाेलीले बुटबलबाट पक्राउ गरेकाे बताइएकाे छ ।
उनीहरुलाई ठगी मुद्दामा आवश्यक कारवाहीका लागि महानगरीय प्रहरी वृत्त ठिमीमा राखिएको छ ।