News Portal

  • गाईजात्रा पर्वबारे नगर प्रमुख सुनिल प्रजापतिको सन्देश

    समाजलाई कोरोना संक्रमणबाट बचाउने महान अभिभारा हाम्रो काँधमा

    सुनिल प्रजापतिभक्तपुर, १८ साउन
    १७६९ पटक
    भक्तपुर, १८ साउन

    दाजुभाइ तथा दिदी बहिनीहरू,
    कोरोना भाइरसको संक्रमण दिन प्रतिदिन बढ्दै गइरहेको छ । देशभरमा अहिले संक्रमितहरूको संख्या २०  हजार नाघिसकेको छ । काठमाडौं उपत्यकामै छ सय भन्दा बढी तथा भक्तपुरमा नै ५० बढी संक्रमित भएका र देशभर ५७ जनाको मृत्युसमेत भइसकेको सरकारी तथ्याङ्कले देखाएको छ ।

    विज्ञहरूका अनुसार नेपालमा कोरोनाको संक्रमण समुदायस्तरमा फैलिसकेको छ । कोरोनाको कारण मृत्यु हुनेको संख्या क्रमशः बढ्दैछ । समाजमा भयावह स्थिति आउनेतर्फ विज्ञहरूले निरन्तर सचेत पार्दै आउनुभएको छ ।

    सरकारले लकडाउन खुकुलो पारेको छ । यसको अर्थ हामी संक्रमणबाट मुक्त भइसकेको होइन, अझ संक्रमणको खतरा बढेको छ । काम गरी खान कुनै बाधा व्यवधान नहोस् भनेर सरकारले लामो समयपछि लकाउन हटाएको हो तर पूर्ण रूपमा हटाइसकेको छैन ।

    लकडाउन फिर्ताको अर्थ भीडभाड गरी भोज भतेर गर्न, जात्राहरू सञ्चालन गर्न, देवी—देवता स्थानमा ठूलो समूह भेला भएर मनोरञ्जन गर्न वा पुजाआजा गर्न तथा सांस्कृतिक प्रदर्शन गर्न छुट दिएको होइन । त्यस्तो बुझाइ कसैमा छ भने त्यो गलत हो ।

    रोगले जाति, भाषा, क्षेत्र र वर्ग चिन्दैन । सबैले आ—आफ्नो सुरक्षा आ—आफैले गर्नु नै कोरोना भाइरस संक्रमणबाट बच्ने सबभन्दा सहज उपाय हो । साबुन पानीले हात धुनु, स्यानिटाइजर प्रयोग गर्नु र मास्क लगाउनु अरु कसैको निम्ति नभएर आफ्नै लागि हो । त्यसैले सबै नागरिकहरूलाई सुरक्षित साथ आ—आफ्नो काममा लाग्नु हुन भक्तपुर नगरपालिकाको तर्फबाट आग्रह गर्दछौं ।

    वीरगञ्ज, राजविराज, विराटनगरलगायतका ठाउँहरूमा कर्फ्यू जारी गरी स्थानीय तहले जनतालाई रोग संक्रमणबाट बचाउने प्रयास गरिरहेका छन् ।

    हामीमा जोखिम त्यो तहमा नपुगे पनि कुनै पनि बेला उपत्यकामा संक्रमणको पूरै भयावह स्थिति हुनसक्नेबारे हामी सचेत हुनैपर्छ ।

    आदरणीय जनसमुदाय,
    गाईजात्रा नजिकिंदैछ । भक्तपुरको गाईजात्रा विशेष प्रकारको जात्रा हो । देशका विभिन्न ठाउँबाट गाईजात्रा हेर्न मानिसहरु भक्तपुर आउने गर्छन् । गाईजात्रा पर्वलाई अनुशासित, मर्यादित र व्यवस्थित गर्न र संस्कृति संरक्षण गर्न यसअघि भक्तपुर नगरपालिकाले गाईजात्राको समयावधिभर प्रस्तुत हुने परम्परागत र आधुनिक विधाका छुट्टा–छुट्टै मूल्यांकन गरी पुरस्कारको समेत व्यवस्था गर्दै आएको सर्वविदितै छ ।

    तर, यो वर्ष कोरोना भाइरसका कारण हामी अत्यन्तै सचेततापूर्वक हिंड्नुपर्ने अवस्थामा छौं । त्यसैले भक्तपुर नगरपालिकाले जिल्ला प्रशासन कार्यालय, महानगरी प्रहरी परिसर, गुठी संस्थान, भैरवनाथ जात्रा सहयोग समिति, बाराही द्योछेँ, भैरवनाथ नाइके, आकाश भैरव नौ दाफा, चपाः दाफा भजन, दत्तात्रय दाफा भजनलगायत सरोकारवालाहरूका प्रतिनिधिहरूसँग पटक पटक बैठक गरी यो वर्ष गाईजात्रामा घिन्ताङघिसी नलाने, दाफा भजनमा सहभागी नहुने र सामान्य औपचारिकता मात्र सीमित गर्ने निर्णय गरेको जानकारी गराउन चाहन्छौं ।
    त्यसैगरी गुँला बाजा समूहका प्रतिनिधिहरूको भेलाले यो वर्ष गुँला बाजा स्थगित गर्ने निर्णय गरेको छ । नगरपालिकाको भावनालाई साथ दिनुभएकोमा उहाँहरू सबैलाई भक्तपुर नगरपालिका धन्यवाद ज्ञापन गर्दछ ।

    कोरोना संक्रमणलाई ध्यानमा राखेर गाईजात्रा सामान्य औपचारिकतामा सीमित गर्ने निर्णयअनुसार यहाँहरूले गाईजात्रामा भिडभाड हुने घिन्ताङघिसी ननिकाल्न, परम्परागत र आधुनिक तथा सांस्कृतिक विधाहरू प्रदर्शन नगर्न तथा पञ्चदानजस्ता पर्वहरू नमनाउन सम्पूर्ण नगरबासीहरूमा हार्दिक अपिल गर्दछौं ।

    हामी स्वस्थ रह्यौं भने चाडपर्व र जात्रा हामी अर्को वर्ष मनाऔंला । समाजलाई कोरोना संक्रमणबाट बचाउने महान अभिभारा हाम्रो काँधमा छ । तपाईं हामी मिलौं, कोरोनाबाट समाजलाई बचाऔं ! यो नै हाम्रो आजको सबभन्दा ठूलो जिम्मेवारी हो । सबैले आ–आफ्नो ठाउँबाट जिम्मेवारी पूरा गरौं । धन्यवाद !

    प्रतिकृया दिनुहोस्

    आदर्शस्थित औषधी पसलमा आगलागी, लाखौंको क्षती

    भक्तपुरको सूर्यविनायक नगरपालिका आदर्श चोक स्थित एक औषधी पसलमा एकाबिहानै आगलागी भएको छ । इन्द्र...

    राधेराधेस्थित हनुमन्ते खोलामा स्कुटी सहित मानिस मृत फेला

    भक्तपुरको राधेराधेस्थित हनुमन्ते खोलामा स्कुटी सहित एकजना व्यक्ति मृत अवस्थामा फेला परेका छन । मध्यपुर...

    मध्यपुर थिमिमा ब्लड बैंक स्थापना हुने, लायन्स क्लवले १ करोड ३२ लाख सहयोग गर्ने

    मध्यपुर थिमि नगरपालिकाले संचालन गरेको नेपाल कोरिया मैत्री नगरपालिका अस्पतालमा ब्लड बैंक स्थापनाका लागि लायन्स...

    बालकोट बस्ने ३२ वर्षिया बुढाथोकी पक्राउ

    उदयपुरको त्रियुगा नगरपालिका वडा नं. ३ घर भई हाल भक्तपुरको सूर्यविनायक नगरपालिका वडा नम्बर-१ बालकोट...

    नयाँ सत्ता समीकरणसंगै तीन मन्त्रीले लिए सपथ

    नयाँ सत्ता समीकरण संगै तीन मन्त्रीले सपथग्रहण गरेका छन् । प्रधानमन्त्री पुष्पकमल दाहाल प्रचण्डको सिफारिसमा...