आज देशभर जनै पूर्णिमा तथा रक्षाबन्धन मनाइँदैछ । यो पर्व हरेक वर्ष श्रावण शुक्ल पूर्णिमाका दिन मनाइने परम्परा रहिआएको छ ।

आजको दिन तागाधारीले आफ्नो जनै फेर्ने गर्छन् । साथै, पण्डितसँग डोरो बाँध्ने गरिन्छ । पूर्णिमाका दिन बिहानैदेखि नदी, पोखरीमा गई स्नान गरेर बिशेष विधिबाट जनै धारण गर्ने गरिन्छ ।यसबाट सुरक्षा प्राप्त हुने धार्मिक विश्वास रहिआएको छ । जनै पूर्णिमाका दिन बाँधिएको धागोलाई तिहारमा लक्ष्मीपूजाको दिनमा फुकालेर गाईको पुच्छरमा बाँधी विसर्जन गर्ने परम्परा छ । यसो गर्दा मृत्युपर्यन्त स्वर्ग जान सकिने धार्मिक बिस्वास रहेको पाइन्छ ।

तराईमा आजका दिन दिदीबहिनीले आफ्ना दाजुभाइहरुका नाडीमा रक्षाबन्धन (राखी) बाधिदिने परम्परा छ । दीर्घायु तथा सुस्वास्थ्यको कामना गर्दै बाधिने यो राखी स्नेहको प्रतीक समेत मानिन्छ । पछिल्लो समयमा यो संस्कृति पहाडी क्षेत्रमा समेत विस्तार हुँदै गएको पाइन्छ ।

जनै पूर्णिमाका दिन बिशेष परिकार क्वाटी खाने चलन छ । एघार थरीका गेडागुडी मिसाई भिजाएर टुसा उमारेर पकाइने परिकार नै क्वाँटी हो । यसरी क्वाँटी बनाई खानाले रोग प्रतिरोधी क्षमतासमेत बढाउने बताइन्छ ।