भक्तपुर, १९ साउन कोभिड १९ का कारण उत्पन्न स्वास्थ्य सङ्कटको अवस्थामा विश्वविद्यालयहरुले गर्ने भनेको परीक्षा स्थगित गर्न नेपाल क्रान्तिकारी विद्यार्थी संघले माग गरेको छ । त्रिभुवन विश्वविद्यालयलगायतका विश्वविद्यालयहरुको भदौदेखि परीक्षा सञ्चालन गर्ने भनी गरेको निर्णय प्रति नेपाल क्रान्तिकारी विद्यार्थी संघको गम्भिर ध्यानाकर्षण भएको जनाएको हो ।
यतिबेला विद्यार्थीहरुलाई आफ्नो क्याम्पस र कोठामा पुग्न सहज नभएको र कोभिड जोखिम कायमै रहेको भन्दै नेक्राविसंघले परीक्षा गर्ने अनुकुल समय नभएको स्पष्ट पारेको छ । संघका केन्द्रीय अध्यक्ष सविन ख्याजूले सोमबार प्रेस बिज्ञप्ती मार्फत सो कुरा स्पष्ट पारेका हुन् ।
”विद्यार्थीहरु सबै सुरक्षित स्थानमा छैनन्, जोखिमपूर्ण क्षेत्रमा पनि धेरै छन् । लामो दुरीको यातायात सञ्चालन प्रत्याभूती हुने स्थिति छैन । यस्तो परिस्थितिमा परीक्षा सञ्चालनकै कारण कोभिड–१९ सङ्क्रमण भयावह हुने सम्भावना छ ।” बिज्ञप्तीमा भनिएको छ ।
त्रिविलगायतले भदौमा परीक्षा लिने निर्णय गरेको पूर्णतः अव्यवहारिक ठहर गर्दै नेक्राविसंघले अन्तर्राष्ट्रियस्तरका विश्वविद्यालयहरुबाट नेपालका विश्वविद्यालयहरुले पाठ लिएर वैकल्पिक माध्यमबाट परीक्षा लिन जोडदार माग गरेको छ ।
त्यसैगरी विद्यार्थीहरुको कोभिड–१९ को विमा सरकारले गर्नु पर्ने माग गर्दै नेक्राविसंघले सङ्क्रमणको खतरा भएसम्म भारतसँगको सिमा बन्द गर्नपर्ने समेत बताएको छ ।