भक्तपुर, २२ साउन काठमाडौं उपत्यकालाई सट डाउन गर्ने तयारी गरिएको छ । उपत्यकामा कोरोना भाइरस संक्रमणको उच्च जोखिम देखिएपछि यस्तो तयारी गरिएको हो ।
सरकारले लक डाउनको विकल्पको रुपमा सट डाउनलाई अघि सारेको छ । पुन लकडाउनको पक्षमा सरकार नभएको सरकारका प्रवक्ता अर्थमन्त्री डा युवराज खतिवडाले सार्वजनिक गरिसकेका छन् ।
सरकारले सुचारु अवस्थामा रहेको सेवाहरु बन्द गर्न लागेको हो । अत्यावश्यक बाहेकका सेवाहरु बन्द गर्न लागेको भक्तपुर जिल्लाको प्रमुख जिल्ला अधिकारी हुमकला पाण्डेले जानकारी दिइन् ।सरकारले जिल्ला प्रशासन, सुरक्षा निकाय तथा नागरिकलाई पनि सुरक्षाको उच्च सतर्कता अपनाउन गरेको निर्देशन र संक्रमितको बढ्दो अवस्थालाई हेरेर यो निर्णय गर्न लागेको प्रजिअ पाण्डेले जानकारी दिएकी हुन् ।
काठमाडौं उपत्यकामा सरकारी कार्यालय, सुरक्षा निकाय तथा बैंकको कर्मचारीहरुमा समेत संक्रमण बढ्दै गएपछि कार्यालयहरु नै संक्रमण सार्ने केन्द्र नबनुन् भन्ने अभिप्रायले अत्यावश्यक बाहेकका सेवाहरु बन्द गर्न लागिएको बताइएको छ ।
कार्यालयहरुबाट हुने अत्यावश्यक बाहेक अरु सेवा तत्कालको लागि रोक्ने र आंशिक रुपमा कार्यालयहरु खोल्ने तयारी भएको हो ।जाेखिम बढेकाे भन्दै भक्तपुरस्थित यातायात सेवा कार्यालयले सेवा बन्द गरिसकेकाे छ ।
अहिले काठमाडौंमा भक्तपुर ललितपुर र काठमाडौ तीनै जिल्लाका प्रमुख जिल्ला अधिकारी तथा सुरक्षा निकायका इञ्चार्जहरुको सयुक्त बसिरहेको जानकारी प्राप्त भएको छ । यसले सट डाउनको मोडालिटी तयार गर्दैछ ।
अपडेट : तीनै जिल्लाका सिडिअेाहरु सम्मलित बैठकले आइतवारबाट २ साता सटडाउनमा जाने निर्णय गरेका छन् । जिप्रकाले अत्यावश्यकबाहेक सबै सेवा बन्द गर्ने र अन्य कार्यालय खोल्ने वा नखोल्ने निर्णय कार्यालय प्रमुखले गर्नसक्ने निर्णय भएको बताइएको छ । त्यतिमात्र हाेइन, सटडाउनमा मास्क नलगाउने, सामाजिक दूरी कायम नगरी भीडभाड गर्ने र असुरक्षित तवरले निजी कार्यालय र व्यवसाय चलाउनेलाई कडा कारवाही गर्दै जेल हाल्ने गरि नै प्रस्तुत हुने बताइएको छ ।