भक्तपुर, २७ साउन भक्तपुर नगरपालिकाका प्रमुख प्रशासकीय अधिकृत इन्द्रप्रसाद बस्याललाई बिदाई गरिएको छ । नगरपालिकाले मंगलवार बस्याललाई बिदाई गरेको हो ।
नगर प्रमुख सुनिल प्रजापतिले प्रमुख प्रशासकीय अधिकृत बस्याललाई भादगाउँले टोपी लगाइदिनका साथै भक्तपुरको प्रसिद्ध ‘मयुर झ्याल’ र नगरपालिकाका प्रकाशनहरु मायाको चिनोस्वरुप दिएर बिदाइ गरेका हुन् ।
उक्त अवसरमा नगर प्रमुख प्रजापतिले भक्तपुर नगरपालिकामा सरुवा भई आउने प्रमुख प्रशासकीय अधिकृतहरु निकै छोटो अवधिमै सरुवा भइजाने हुँदा नगरपालिकालाई काम गर्न अप्ठेरो भएको बताएका थिए भने अधिकृत बस्यालले भक्तपुरले शिक्षा, स्वास्थ्य र सम्पदा पुनःनिर्माणमा उल्लेखनीय काम गरिरहेको र देशकै नमूना नगरपालिकामा बसी काम गर्न पाउनु गौरवको विषय भएको भनेका थिए ।
बिदाई कार्यक्रममा उपप्रमुख रजनी जाेशी, वडा नं ९ का वडाध्यक्ष रवीन्द्र ज्याख्व लगायतका जनप्रतिनिधि तथा कर्मचारीहरु उपस्थित रहेका थिए ।
भक्तपुरमा ७ महिनाको कार्यकालमै बस्यालको सरुवा भएको हो । उनी भक्तपुर नगरपालिकाबाट प्रधानमन्त्री तथा मन्त्रीपरिषद्को कार्यालयमा सरुवा भएका हुन् ।
