२९ श्रावण २०७७काठमाडौं । पछिल्लो २४ घण्टामा भक्तपुरमा थप ५ जनामा कोरोना संक्रमण पुष्टि भएको छ । यो सँगै भक्तपुरमा संक्रमितको संख्या ११० पुगेको स्वास्थ्य मन्त्रालयले जनाएकाे छ ।
भक्तपुरमा संक्रमितको संख्या ११० पुगेको स्वास्थ्य मन्त्रालयले जनाए पनि भक्तपुरमा कूल संक्रमित संख्या १ सय २ मात्र भएकाे स्वास्थ्य कार्यालय भक्तपुरका प्रमुख कृष्ण बहादुर मिजारकाे भनाइ छ । बिहीवार ५ जना संक्रमित थपिए संगै हालसम्म संक्रमितको संख्या १ सय २ पुगेको र यसमध्ये ५३ जना संक्रमित सन्चो भई घर फर्किसकेका स्वास्थ्य कार्यालय भक्तपुरका प्रमुख कृष्ण बहादुर मिजारले जनाएका छन् ।
यस्तै बिहिवार मात्रै काठमाडौं उपत्यकामा थप १२७ जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयको नियमित कोरोना ब्रिफिङका क्रममा प्रवक्ता डा. जागेश्वर गौतमले काठमाडौंमा १११ र ललितपुरमा ११ जनामा संक्रमण भएको बताए।
आज थपिएका सँगै काठमाडौं उपत्यकामा १ हजार ५ सय ८१ संक्रमित संख्या पुगेको छ। काठमाडौंमा १२८० र ललितपुरमा १९१ संक्रमित पुष्टि भएको मन्त्रालयको तथ्यांक छ।
विहिवार देशभर ५ सय २५ जनामा संक्रमण पुष्टि भएको मन्त्रालयले जनाएको छ। आज थपिएका सहित नेपालमा कुल संक्रमित २४ हजार ९ सय ५७ पुगेको छ।
हालसम्म कोरोना संक्रमणबाट ९५ जना मृत्यु भएको मन्त्रालयले जनाएको छ।