चितवन, ३१ साउन रत्ननगर नगरपालिकाद्वारा संचालित बकुलहर रत्ननगर अस्पतालका मेडिकल सुपरिटेण्डेण्ट डाक्टर विश्वबन्धु बगालेमाथि कोरोना पोजेटिभ देखिएपछि भएको सामाजिक दुर्व्यवहारप्रति अस्पतालले खेद प्रकट गरेको छ।
अस्पतालका अध्यक्ष नारायण वनले शनिबार एक विज्ञप्ति जारी गर्दै कोरोना महामारीमा अग्रपंक्तिमा रहेर काम गर्ने स्वास्थ्यकर्मीलाई प्रोत्साहन गर्नुको सट्टा उल्टै हतोत्साहित बनाउने हर्कत दुर्भाग्यपूर्ण र निन्दनीय भएको भनेका हुन् ।उनले स्वास्थ्यकर्मीलाइ हतोत्साहि नगरी हाैसला र सम्मान गरिदिन सार्वजनिक अपिल गरेका छन् ।
बकुलहर रत्ननगर अस्पतालका मेडिकल सुपरिटेण्डेण्ट डा. बगाले तथा उनकी श्रीमतीमा कोरोना पाेजेटिभ पुष्टि भएपछि भरतपुर ४ स्थित उनकाे घर छिमेकका स्थानीय अगुवाहरु व्यक्तिहरुले नै उनको निवासमा गएर संक्रमित क्षेत्र लेखिएको ब्यानर टाँस्न खोजेका थिए।
आफूहरु स्व:शील भइ सुरक्षित तरिकाले बसेको अवस्थामा समाजका बुज्रुक भनिएका केहि मानिसहरूको यस किसिमका हर्कतले मर्माहत भएको भन्दै डा बगालेले आफ्ना जस्ता छिमेकी अरुका नपरुन् भनी सामाजिक संजालमार्फत दुख व्यक्त गरेका थिए ।
