काठमाडौं, ३२ साउन । नेपालका विभिन्न शैक्षिक संस्थामा ए लेभल अध्ययन गरिरहेका विद्यार्थीहरु आन्दोलित भएका छन् । यी क्यामपसहरुलाई ए लेभल पढाइको मान्यता दिएको बेलायतस्थित क्याम्ब्रिज विश्वविद्यालयले नतिजा प्रकाशन गर्दा अनियमितता गरेको गुनासो गर्दै उनीहरु आन्दोलित भएका हुन् ।
क्याम्ब्रिजले ए लेभको नतिजा गत साता सार्वजनिक गरेको थियो । कोभिड १९ को संक्रमणका कारणले परीक्षा सञ्चालन गर्न नसकेपछि विश्वविद्यालयले विद्यार्थीको मूल्यांकन गरेर अंक पठाउन सम्बन्धित क्याम्पस र शिक्षकलाई अनुमति दिएको थियो । सोही अनुमतिको आधारमा मूल्यांकन गरेर पठाएको अंकमा व्यापक हेरफेर गरेर विश्वविद्यालयले नतिजा प्रकाशन गरेको विद्यार्थीको आरोप छ । क्याम्ब्रिजले नतिजा प्रकाशन गर्दा ए ग्रेड ल्याउन सक्ने विद्यार्थीलाई डी दिएको छ । डी मात्रै ल्याउने क्षमता भएका विद्यार्थीलाई ए दिएको विद्यार्थीको गुनासो छ ।
नतिजा सच्याउन माग गर्दै विद्यार्थीले ब्रिटीस काउन्सिल अगाडि धर्ना दिंदै आएका छन् । उनीहरुले चिठ्ठा सार्वजनिक गरे जसरी नतिजा दिन बन्द गर, शिक्षकलाई विश्वास गरु भन्ने प्लेकार्ड बाकेर काउन्सिल अगाडि धर्ना दिएका थिए । काउन्सिललाई पत्राचार गरेर नतिजा सच्याउन उनीहरुले लिखित अनुरोध समेत गरिसकेका छन् ।
नेपालमा ए लेभलको परीक्षा सञ्चालन, नतिजा प्रकाशन लगायत अन्य व्यवस्थापन काउन्सिलले गर्छ । मल्पि एकेडेमीमा ए लेभल पढिरहेका एक विद्यार्थीले भने, ‘नतिजामा थुप्रै क्रृटी छन् । राम्रो नतिजा ल्याउने आशामा रहेका विद्यार्थीलाई निराश बनाएको छ । कतिपय विद्यार्थीले सोच्दै नसोचेको ग्रेड पाएका छन् ।’
नतिजा प्रकाशन भएपछि स्नातक तहमा अध्ययन तयारी गरिरहेका थुप्रै विद्यार्थीहरु नतिजा गडबड भएपछि अध्ययनबाट वञ्चित हुने अवस्था आएको उनीहरुको गुनासो छ । उनले भने, ‘थुप्रै साथीहरु विश्वविद्यालयमा छात्रवृत्तिका लागि छनौटसमेत भइसकेका छन् । उनीहरु नतिजा मात्र कुरेर बसेका थिए । तर अकस्मात नतिजा नराम्रो आएपछि छात्रवृत्तिमा पढ्न पाउनु त कता हो कता, स्नातकमा भर्ना नै हुन नपाउने अवस्थामा पुगेका छन् ।’ अन्नपूर्ण पोस्ट्