भक्तपुर, ५ भदौं भक्तपुरको सल्लाघारीस्थित अक्सफोर्ड मार्ग सिल गरिएको छ । उक्त स्थानमा एक युवतीमा कोरोना पोजेटिभ पाइएपछि अक्सफोर्ड मार्ग सिल गरिएको हो ।
भक्तपुर नगरपालिका वडा नम्बर १ सल्लाघारी स्थित अक्सफोर्ड स्कूलनजिकै कोठा भाडामा बस्ने एक २१ वर्षिया युवतीमा कोरोना पोजेटिभ पुष्टि भएपछि उक्त क्षेत्र सिल गरिएको वडाध्यक्ष श्यामकृष्ण खत्रीले जानकारी गराएका हुन् । उनी अबिबाहित रहेको र कोठामा एक्लै बसिरहेको बुझिएको छ । बिहीवार साँझ संक्रमित युवतीलाई खरीपाटी आइसोलेसनमा पठाएपछि जनप्रतिनिधिको रोहबरमा स्थानीय प्रहरी र नगर प्रहरीले उक्त क्षेत्र सिल गरेको थियो ।
संक्रमित युवती दूरसंचार सेवा प्रदायक एनसेलका लागि काम गर्ने एक आउटसोर्स कम्पनीकी कर्मचारी भएको जानकारी प्राप्त भएको छ । उनलाई कम्पनीले नै स्वाब संकलन गरी परीक्षण गर्दा कोरोना पोजेटिभ पुष्टि भएको थियो । आफूमा कुनै लक्षण नभएको जिकिर गर्दै उनले आइसोलेसनमा जान नमानेपछि वडाध्यक्ष श्यामकृष्ण खत्री, वडासदस्य सूर्यप्रसाद श्रेष्ठ लगायतको पहलमा उनलाई खरिपाटीस्थित आइसोलेसनमा पठाइएको छ । भक्तपुर नगरपालिका वडा नम्बर १ मा कोरोना संक्रमणको यो पहिलो केस देखिएको वडाध्यक्ष खत्रीले जनाएका छन् ।
सच्याइएको : संक्रमित युवती दूरसंचार सेवा प्रदायक एनसेलका लागि काम गर्ने एक आउटसोर्स कम्पनीकी कर्मचारी हुनुपर्नेमा अन्यथा भएकोले सच्याइएको छ । -सम्पादक