भक्तपुर,१३ भदाैंभक्तपुरको सूर्यविनायक स्थित एक डेरी संचालकले सडकमै दूध पोखेका छन् । स्थानीय रानीकोट डेरीका सञ्चालकले बिक्री नभएको भन्दै शनिवार विहान सडकमै दूध पोखेका हुन् ।
जिल्लास्थित घरेलु तथा साना उद्योग कार्यालयका प्रमुख सुवोधकुमार साहले भने दूध पोख्नुपर्ने अवस्था नरहेको जिकिर गरेका छन् । भक्तपुर पोस्टसंग कुरा गर्दै प्रमुख साहले निषेधाज्ञाका कारण दूधको कारोबारमा केही कमी भएपनि फ्याक्नै पर्ने अवस्था नरहेको जिकिर गरे ।
”डेरीका सञ्चालकले हामीसंग कुनै समस्या नै राख्नुभएको छैन । उहाँले दूध फालेको मैले पनि समाचारबाट थाहा पाएकाे हुँ ।” घरेलु तथा साना उद्योग कार्यालय भक्तपुरका प्रमुख सुवोधकुमार साहले भने । संकटको समयमा आर्थिक कारोबार घटेका कारण त्यसको प्रभाव दूधमा पनि परेको हुनसक्ने भन्दै उनले छलफल नै नगरी दूध पोख्नु जायज नभएको र यो व्यवसायीको व्यक्तिगत लहड मात्र भएको बताए ।
केहि समयका लागि दूधको मूल्य घटाएर बिक्रीवितरण गर्न सुझाव दिंदै उनले व्यवसायीलाई संयमित हुन र बिक्री नभएको दूधबाट दूग्धजन्य पदार्थ उत्पादन गरिराख्न आग्रह गरेका छन् । उद्योगी व्यवसायीलाई आफ्नो समस्या खुलस्त राख्न अनुरोध गर्दै उनले आफूले समस्या समाधानका लागि आवश्यक समन्वय गर्ने बताए ।
जिल्ला प्रशासन कार्यालय भक्तपुरले निषेधाज्ञाको समयमा विहान ९ः१५ बजेसम्म मात्रै खाद्यान्न र डेरी पसल सञ्चालन गर्न पाईने आदेश गरेपछि डेरी व्यवसाय समेत प्रभावित भएको छ । यसअघि लकडाउनका समयमा भने खाद्यान्न र डेरी पसल औषधी पसल जस्तै जुनसुकै समय खुला रहेका थिए ।